《膠戰S2》昨晚首播 製作團隊親揭選「6膠」Edan／Jeffrey／Hillary等主持原因

由Edan（呂爵安）、岑珈其、Jeffrey（魏浚笙）、Hillary（劉沛蘅）、阿正（黃正宜）和肥腸（徐浩昌）主持嘅ViuTV綜藝節目《膠戰》好評如潮，今年初推出特別篇《膠戰新春SP》而第二季《膠戰S2》亦已經喺噚晚（10日）首播。日前ViuTV嘅《今世做電視》系列邀請《膠戰》製作團隊，期間講到選擇「6膠」主持嘅原因、主持如何得出個人性格等等。

片段約長12分鐘，一開頭編審文靜就指《膠戰》最初構思係大家冇得出埠，所以就想做啲嘢令大家可以圍住睇，冇壓力之餘又睇得開心。之後監製阿宏及文靜就一齊講選擇主持嘅原因，仲話Edan同岑珈其係最開頭嘅人選，之後佢哋認為要有肥仔，所以就搵肥腸加入，組成喜感鐵三角。喺呢個時候，文靜就爆料話監製要求有女主持加入，仲話Hillary係監製自己揀。阿宏其後就話阿正加入令大家睇得好開心。至於Jeffrey，原來佢係最後一個加入，因為佢哋當時覺得一定要有一個靚仔，不過呢個靚仔一定要膠，而Jeffrey喺試鏡時就被覺得佢好膠、有天然呆嘅感覺、試玩無聊遊戲時好有勝負欲同好認真。

之後，二人再大讚主持們為節目花咗唔少心機，好似佢哋努力突出自己嘅性格（Edan成日好變態咁對Hillary及珈其好易被辣㷫 ）及認真對待無聊小遊戲。

新一季嘅節目喺噚晚已經首播，唔知大家覺得好唔好睇呢？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！