【亞洲小姐】薛影儀開Live唱歌超過8千人睇 網民：香港樂壇要等阿儀拯救

《亞洲小姐競選2021》日前完成首輪面試，17號佳麗薛影儀成功突圍而出，成為網民嘅焦點。雖然佢未能入圍，不過就獲得亞視高層賞識跳過選秀，立即安排佢簽約成為旗下藝人。與亞視簽約兩年嘅阿儀，一加入公司工作就接踵而來，噚晚仲被安排喺網站與主持開Live唱歌，人氣爆晒燈嘅阿儀，令到呢個live一晚累積接近374,00觀看次數，收睇直播嘅觀眾更加超過8千人 。

亞視音樂節目《A-Live》噚晚安排阿儀作客，與主持兼琴手李昊昕（Bryan）唱歌兼傾偈一個半鐘頭，阿儀喺直播中大展歌喉，唱出多首歌曲，例如《兩種人》、《對面的女孩看過來》、《天使》、《初心》及《女神》等等，阿儀嘅表現相當淡定，唔少網民都紛紛留言讚佢嘅表現及勇氣可嘉，例如「好正！多謝你帶俾我歡樂」、「全世界唔明白你唔緊要 加油加油 我愛你」、「好有自己風格」、「你好有勇氣，加油」、「支持阿儀做全職歌手，香港樂壇要等阿儀拯救」、「喜歡阿儀夠真，加油」、「睇阿儀仲好睇過Mirror」及「香港樂壇欠佢一個交代」等等。

睇片

喺傾偈期間，Bryan問咗多條問題令大家可以更加了解阿儀，例如知道阿儀喜歡嘅歌手係古巨基而非方力申、之前阿儀係冇參加過其他選美比賽，參選亞姐嘅原因係想嘗試、攞經驗及識朋友、除咗唱歌佢會向跳舞、拍戲等方面發展、佢冇留意MIRROR不過就好欣賞炎明熹。

今次嘅Live獲得網民高度關注，得到超過8千人收睇，仲話係亞視最紅嘅一日。除咗阿儀嘅表現淡定之外，Bryan表現專業亦獲得網民嘅讚賞。除此之外，仲有網民話為咗阿儀而放棄睇奧運，例如「為咗阿儀 奧運都唔睇」及「為咗呀儀我決定放棄睇奧運」等等。

另外，更有網民喺Facebook開設群組「我老公J左薛影儀導致婚姻破裂關注組」，至今已經超過1300人加入，真係好犀利呀！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！