【大茶飯】一隻可塑性極高GO股（青冰）

恒寶企業（1367）上周一宣佈，大股東廖英賢、鄭立言、廖頌棠、余遠茂及高立誠共75%股權，獲黎亮洽購，每股作價1.4271元，交易極速於3日後完成，黎亮需同時提出全購（GO），現正等待公司發出通函。黎亮何許人也？根據通告，他於2007年至今年6月曾為中國智慧能源（1004）主要股東，現時亦為該公司執董，他亦曾於2002至2009年擔任中電新能源（735）執董。

齌睇呢啲數據，係咪好普通？你試下喺Google打黎亮兩個字，你會發現另一個人嘅名稱。無錯，就係國務院前總理李鵬女兒李小琳，據悉兩人密友關係乃公開秘密，自從李小琳轉趨低調後，黎亮亦銷聲匿跡，今次突然高調復出，當然值得憧憬。

公司發行股數4.8億股，以每股1.4271元計算，作價總值6.85億銀，扣除最新淨資產1.4億銀，即殼價約5.5億元，屬合理價。還有一點要留意，恒寶8月22日大棍崛起兼成交急增，翻查CCASS，主要掃貨券商為信達，達1,647萬股，而在宣佈賣盤後嘅復牌日，恒寶主要沽盤亦來自信達，埋單計數共沽1,572萬股，可以推斷春江鴨已全數食糊，阻力只會更少，現價僅較GO價高唔夠兩格，仲要有保底價呢條保險線，實在搵唔到理由唔買！