【股壇衝鋒車】細價股的坐貨策略（周沖）

周二，中港股市繼續哀鴻遍野兼血流成河，大股固然插到不似人型，細價股當然又畀人洗倉，周沖近半個月收到不少雅虎網民電郵，詢問如何處理倉內艇貨，今日一次過回覆，下文幾個典型的散戶輸錢模式，請對號入座，只要以後不再犯同樣錯誤，喺如此冧市下實在要學阿Q式的精神勝利法，笑著渡難關總勝日日愁眉不展。

後知後覺型: 呢類散戶通常問，我1元入貨，現價0.5元，點算? 插咗50%先問前程，正如你返學冇交功課，回家問阿媽應該點做? 老實講，大部分細價股都係漲速跌銳，入市後自己宜設定10至20%的止蝕位，因為留得cash在，那怕冇股炒? 當手中艇貨愈跌愈多兼買盤稀疏，屆時想止蝕都要隔空質，輸得更悲慘。例子，連年虧損的星美文化早前由3角炒上1.29元，成交日日逾億元，昨天跌至0.58元，成交只有390萬元，若市場氣氛持續弱勢，成交恐怕進一步縮減。

愈溝愈輸型: 唔少散戶聽消息衝入細價股，並堅信線人的目標價，當股價比其買入價下跌幾成，便入市溝貨，以期沖淡成本。周沖話你知，當細價股熱潮退卻，不少券商即收緊孖展，勢觸發斬倉潮，導致股價一浪低於一浪，結果係愈溝愈輸得甘。例子，創聯教育(2371)上月高見0.86元，昨收報0.26元，若沿途溝貨，便輸多幾鑊。

迷戀空氣型: 不少細股借冲場氣氛熾烈時搞市場熱炒業務，例如4至5月時中港股市熱炒的媒體或互聯網+業務，由於這類公司多數係話有意拓展相關務或者與相關業務的賣家簽(MOU，諒解備忘錄)，換言之，其股價炒上都係靠憧憬，說穿了就係炒空氣，當莊家散完貨，空氣股便現型大插，這類股比比皆事，股價要返家鄉相信難過登珠穆朗馬峰，真係只有神才能解救你。

價值堅守型: 有的細價股可能坐了艇，但其基本因素或資產負債表吸引，若錯過止蝕機會，周沖建議可效法金庸筆下的郭靖，用死守襄陽城策略。例如周沖早前推介過的森信(731)及合豐(2320)，兩者多年來業務穩定兼有派息，市值低過殼價，而且PB分別低見0.28及0.35，真係點秤都抵博。

唔好怪周沖寸寸貢，其實想講出大家都明白的道理，只係部分散戶拒絕承認睇錯的殘酷事實，又唔肯止蝕，結果愈蝕愈多，最終可能對股票失去興趣而錯過未來的大升市。都係呢句廢而有力的話: 量力而為，勿借孖展。

chowchung123@yahoo.com.hk