吳鎮宇為Sammi處男下海 高唱《歲月如歌》

【星島日報報道】鄭秀文（Sammi）紅館騷昨晚已去到尾二一場，即第7場，請來「演唱會稀客」吳鎮宇出場，掀起全場哄動，鎮宇笑言飛機泊在紅館外，原來Sammi在Part 1時已經邀請過他做嘉賓，可惜他無暇出席，今次來找數。他對Sammi笑說：「其實上次未練成功…（練咩？玉女心經？）其實我未試過公開唱歌㗎！（唱咩歌？）《帝女花之香夭》…點解無公開過唱歌呢？因為冇人搵我。其實上到嚟要做乜？啲歡呼聲從四方八面嚟的？！」Sammi笑說：「我要爆佢小秘密，唔好睇佢依家扮晒老定，其實隻手濕過條啱啱洗濕的底褲。」鎮宇解釋：「我一踏入升降台，電筒一照，隻手就濕晒，濕到咁即係可以high起來啦！」全場大笑。 Sammi表示跟鎮宇合作拍電影驚到不敢打招呼，因為對方工作超認真，Sammi自問出名嚴謹，但鎮宇比她嚴謹兩倍。鎮宇說：「我好唔抵得，點解佢哋要咁做？有時無得返轉頭㗎嘛！比如唱歌，唱得好唔好都係嗰一次，反正都賣晒飛收晒錢。但電影觀眾要睇片段先至買飛入場，唔能夠苟且。」Sammi表示跟鎮宇合作電影獲益良多，學得對自己更嚴厲，所以演唱會走音時她痛哭，鎮宇笑說：「唔緊要，今日我嚟走音比你更厲害。（你終於明白點解我今晚搵你嚟！）仲有，另一個係黃子華，佢的楝篤笑最好睇、最好笑就係佢自彈自唱部份。」Sammi爆鎮宇為上台演唱3分鐘，專程請老師學唱歌。她說：「其實佢一聽到我請佢做嘉賓，佢好快答應，仲馬上練歌，請老師練咗6堂。我仲要爆多個秘密，佢本來今日想整埋『Sam哥』蛋撻頭和著埋飛機師制服嚟，我話使唔使咁行呀你？佢真係好認真㗎！」Sammi回後台換衫，鎮宇對觀眾笑說：「唔使驚，Sammi唔回水，我走音，我回水！」音樂響起《歲月如歌》前奏，全場立即瘋狂尖叫。

睇更多