雅虎香港新聞 
大肚婆飯局 謝安琪繼續貪靚 素顏吳若希晒肉腿
歌手 謝安琪 (Kay) 與老公張繼聰去年再次造人成功，宣布陀B女，轉眼間已經懷胎十月，今個月底生得！而另一位靚媽吳若希(Jinny) 就仲有一段時間先生，日前就大晒同男友Alex Ho影的大肚寫真，佢仲半裸上陣大晒勁爆身材㖭！兩位靚靚大肚婆日前難得聚頭，原來係同歌手許廷鏗、以及阿Kay的大肚化妝師飯聚。見到阿Kay就依然咁貪靚，紥孖辮着厚底鞋；而素顏Jinny就發福不少，差啲唔認得佢！
延伸閱讀：
「飛船」謝安琪四圍去
阿Kay去年宣布停工，造人成功陀B女湊成個「好」字，預產期係今個月尾，阿聰更以「飛船」去形容太太個巨肚！而為了安全起見，緊張老公阿聰早已下令個肚籮咁大的Kay乖乖留家待產，不過本刊早前就影到巨肚Kay出動食魚蛋粉又四圍shopping，仲着住對四吋厚底內增高白色鞋，認真牙煙！
吳若希半裸影寫真
Jinny懷孕後一直深居簡出，已久未有露面，最多都係喺社交網站放相放片。日前佢同唔少媽媽一樣，希望襯懷孕時留倩影，孖男友Alex影靚靚大肚寫真！相中Jinny半祼上陣，由以前的平平無奇變成巨胸，露半球非常吸睛！甜蜜黑白照中兩人攬到實，Alex則輕呀吻女友面珠，佢仲留言：「無論你變得幾肥美，我都會一樣咁錫你～」
大肚婆飯局
呢日許廷鏗就喺IG上載咗同三個大肚婆的合照，分別係阿Kay、Jinny，另外仲有阿Kay個化妝師。相中阿Kay個幸福雙下巴唔見咗，面尖尖紥起孖辮，甚有少女味道，再配上佢至愛的厚底鞋，認真貪靚！至於Jinny個肚就冇阿Kay咁大，呢日佢就素顏上陣，亦乖乖着上平底鞋，不過短裙下就露出一雙「肉腿」！
許廷鏗留言話呢個「七人」飯局夠晒經典，難得幾位大肚婆臨盆在即都抽空出嚟食飯，相信下次見面時，三位靚媽的BB已經出咗世啦！
全文完
延伸閱讀：
