婚宴回本人情價

【星島日報報道】今年唔知乜事，特別多老友下代結婚，大喜事也，所以，一定要 套老西 人情捧場。 參加婚宴，一則以喜（為老友高興），一則以煩，因要執正到賀。最慘，婚宴江湖規矩（唔知邊個定！），八時入席，九時未有得食。乳豬出場前，又要睇片，又要致詞，又要乜乜物物，總之，冇九點半休想起筷。結果呢？次次就算唔食甜品，都要「磨」到十一點半才能鬆人，實在太疲累 。 講真，相信冇幾多「正常人」會喜歡去飲的。 去飲，當然要做人情，究竟做幾多先合理呢？我好少理，近幾年劃一價——一千大元，唔理你在街坊酒樓又或五星級大酒店Ballroom搞，一概金牛一張。不過，倒亦好奇，今時今日搞婚宴，要收幾多錢人情一位，才可以打和？某婚宴搜尋網公布《香港婚宴人情打和價統計二○一六年第二季報告》（水蛇春咁長！）指出，哈，好玩，原來想賺大錢，有計，走去新界某集團宴會廳可以，人情每位三百五十三元已收回成本，大把水位賺！愈多客人愈賺，一個幾百元，十個幾千元，一百個就幾萬元！請幾百人呢？即執七位數字！ 但要得體有面子，當然首選五星級酒店。咁就分分鐘入肉 。因若個個似小弟般封一千元公價人情，連紅酒、小帳，每位成本價約二千二，即一位貼千二，十位萬二，一百位就十二萬元！去得五星酒店擺，定必交遊廣闊，有頭有面，最少開幾十圍。如此，「蝕」一百萬元不奇！ 老友「大班C」剛娶完新抱，正正在名牌五星酒店搞，果然，收完人情要蝕過百萬元。佢大把錢，當然唔肉痛。不過，生意人，數口非常精，對某 隱藏費用，更清楚列明：「肥碌，我醒大廚都十萬元啦，畀佢同兄弟分。因為，用乜料佢決定，例如冬菇、瑤柱，用倉底貨或靚貨，酒店老闆鬼知咩，所以，貼士必須最重手！」 阿碌開咪 曾智華 專欄