年輕人上車無望 香港樓市絕望四大真相

買樓，已經成為香港呢一代年輕人嘅核心問題（唔排除有少部分人完全唔在乎，但只係極少部分），年輕人上車亦係現屆政府急需處理嘅問題。奈何，社會大環境之下，年輕人買樓仍然無望。雖然經常宣傳每年新盤供應量何其多，但每每一出必買搶，君不見最近辣招下，香港想換樓嘅家庭就真係辣親，只能按兵不動，反相大陸豪客冷笑一聲繼續掃新樓，最近紅磡一個新盤，更錄得4成賣家為大陸人。絕望中見希望？傻的嗎，大家認清香港樓市嘅真相未呀？

發展商目標非香港人
「128呎新盤參考大學宿舍」、「特首無話要畀香港人買得起」如此冷血無良嘅說話，如今由發展商口中講出已經唔係咩新奇事，發展商嘅新樓，定價定非畀一般香港人買，只容許炒家及大陸人買，只要有錢搵就得，唧牙膏式賣樓、多伙買家優先揀樓等措施，咩「社會責任」、「企業良心」，值錢嗎？

政府帶頭樓價不跌
一直以嚟香港人都係逐級而上，住公屋，然後儲夠錢就換居屋，然後再換私樓；要樓市健康，第一道關卡就係居屋市場，只要居屋價錢合理，私樓價錢就會自動下調，但目前政府市建局起嘅樓，幾乎同私樓一樣價錢，而面積一樣係劏房格，根本係變相幫發展商穩定樓價。

跨代貧富懸殊
香港貧富懸殊情況世上數一數二，加上樓市不健康發展之下更會造成跨代貧富懸殊，有錢嘅人直接畀錢仔女買樓，成為父幹一族；無父幹嘅人只能租樓，然後父幹一族可以慢慢儲錢，一間層變兩間、三間；無父幹嘅租樓一族根本難以儲錢追上急升嘅樓價，變相一世幫人供樓。

社會風氣失去理性
目前社會上大家都覺得年輕人就係要一棟數，有父幹就靠父母畀錢，無父幹就死慳死抵，幾年唔去旅行唔出街食飯換來首期；然而佢哋最後可能都換嚟300呎嘅偏遠區域嘅樓；任何大家恥笑嘅劏房盤、偽豪宅都有價有市，大家都唔爭氣繼續幫襯之下，樓價根本無可下調至合理水平。