張家朗奧運奪金 前女友馬詠茹感動落淚：今次全香港人都為你感到驕傲

有「193劍神」之稱嘅港隊劍擊代表張家朗喺噚晚舉行嘅東京奧運男子花劍決賽，以15:11成功擊敗意大利選手加羅索（Daniele Garozzo）奪得金牌，為香港奪下史上第二面奧運金牌，成為香港人嘅驕傲。除咗唔少藝人都有喺社交網站出PO祝賀之外，張家朗嘅前女友都有喺社交網站隔空送上祝福，上載感動落淚照片並寫上「今次全香港人都為你感到驕傲」。

奪金後嘅張家朗即時成為全港嘅焦點，甚至連私生活都被起底。據知現時單身嘅張家朗與前香港女子單車運動員馬詠茹（Vivian）拍拖接近三年，係運動界內嘅金童玉女。佢哋拍拖期間相當恩愛，喺張家朗嘅IG經常出現hashtag「#cklmwy」，呢個係佢哋名字嘅簡寫，而出現時間就係2018年初至上年11月。馬詠茹喺2019年接受訪問，除咗提起男友笑得甜絲絲之外，仲大讚佢係一位出色嘅運動員。雖然佢哋已經分手，不過再見亦是朋友，依然互動追蹤社交網站及讚好對方嘅帖文。

現年23歲嘅馬詠茹曾因應付DSE而退出港隊，成功入讀中文大學酒店管理學系。之後，香港自由車隊總教練誠邀馬詠茹出山，於是佢決定休學復出，仲喺2017年開始與李慧詩合作。不過佢喺2019年取得團體競速賽銀牌後選擇重返校園，再次退出港隊。樣貌標致嘅佢近年除咗做KOL及出席品牌活動，仲為歐國盃節目及NowTV奧運節目擔任主持。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！