最怕遇到大富豪

【星島日報報道】香港,從來是個太平城市。不過,自從年前綁架大賊張子強出現,令富豪圈中人人自危,一時間,聘請保鏢成風。一方面為保安全,另一方面呢?大家心照,「身分象徵」也。結果,提供大量就業機會畀班前警隊保護要人組及 喀兵。 本來,一切唔關公眾事,不過,煩在大富豪自己、太太、情人、仔女,全部都會到公眾地方,又全部有保鏢,呢呢,咁就令市民感到不便 ,包括小弟在內,已試過好幾次MM聲。無他,我間中都會被朋友約到「富豪飯堂」見面。首先,若撞正任何富豪一齊抵達,已夠冇癮。因為班「大猩猩」慌死老細及家人畀任何人碰到,所以,當正由落車到飯店門口為私家路,封死唔准過,離晒譜。好 ,入到酒家,就門口一個、走廊一個布陣,搞到氣氛非常緊張。 最慘,大富豪不少有咁上下年紀,膀胱鬆弛,一餐飯要去幾次小便。呢呢,咁就弊!因為,保鏢最怕老細在「殊殊」時被偷襲,故此,將佢成隻「五筒」咁圍住,將洗手間由公眾變半私家咁滯。小弟雖仍有一兩格可用,但,點得呢?男人「殊殊」都要Privacy,你擺個「猩猩陣」在我身邊,點可以去得暢快呢?所以,講真,富豪飯堂出品,雖然美味,但我真的完全沒有興趣去! 昨日,老友B太又向我呻:「喂,阿碌,唔該你寫 ,請班大富豪阿太,低調 好唔好?」 乜事呢?原來,B太因子女開學,要到百貨公司買各種用品。咁 ,大富豪阿L個情婦又拖住個女去Shopping,碰正外面天雨,所以,情婦個「猩猩陣」全部 住把濕雨遮幫佢沿途開路。咁搞,自不然令其他顧客非常厭煩。問題在,情婦又唔識做,大模斯樣在「五筒陣」中自顧自選購用品,一聲唔好意思都冇講,當然極討厭。 其實香港人不會憎人富貴,但請收斂點! 曾智華 副刊