為茶包風波 自認愚蠢自大 阿蘇：網民鬧得好

(綜合報道)(星島日報報道)蘇施黃早前因酒店茶包收費問題開咪鬧爆對方，即被網民圍插，隨後她向商台請假，未有露面回應事件，事隔個多星期，昨日阿蘇終返電台接受訪問。阿蘇開腔：「我唔會咁衰女，唔會走咗去，我真係約咗屋企人坐郵輪。」文：張穎芝 圖：朱偉彥 蘇施黃表示從小到大的家訓是被鬧千祈不要解釋和駁嘴，因自己經常鬧人，所以被鬧也沒所謂，吸收大家的資料，並會去消化。她說：「細蚊仔時去消化係好難，因為冇謙虛心，亦係自大狂，依家覺得咁係對自己有着數(不駁嘴)。」 阿蘇自覺一直被Fans及身邊人寵壞了，其自大、驕傲令自己的路較困難，她自嘲性格衰過人，說話不懂轉彎，被網民鬧樣衰，她說樣衰改不到，但現時學懂無論邊個話自己，話人的不是小人，是貴人。 今次事件上，阿蘇會對自己更嚴謹，自稱非小器的人，經常鬧人也預會被人鬧，自己會作檢討，亦不再評論事件上誰對誰錯。她說：「呢件事上，自己處理得好愚蠢，因為可以Win Win雙贏局面，畀意見令人容易接受同改進，但我畀意見態度唔好，囂張，有私心，可能係私心為咗300蚊㷫㷫哋，所有我都會檢討。」 她沒有嬲網民，被鬧令她檢討和進步，笑言如幾十歲也不檢討就去死吧。她說：「網民係鬧得好，以後亦唔介意佢哋咁。」她稱在這行多年已沒甚麼人夠膽鬧她，有人鬧她好難得，好彩今次犯小錯，但反應大。去聲討人要有好提議令大家一齊進步，如鬧完人就走去，這是沒建設性。 阿蘇續說：「講道理酒店係啱晒，希望佢哋做好，良好優質服務態度未達到。如打官司我會輸，佢哋冇錯，只係唔同角度去睇。」 銘記金句 她憶述30幾歲在琴行工作時犯下大錯，至今仍銘記公司老闆的金句「客人永遠是對的，就算客人錯，也永遠是對的。」她覺得退一步，自己也有益處。問這金句是否說給酒店侍應聽？她說：「我冇咁講，係講畀自己聽，侍應明唔明唔緊要。」 問日後再遇不好的服務態度會否照鬧？她直說：「會照鬧，但唔會咁愚蠢，因今次令人感覺唔好，會聰明啲，達至雙贏，大家有得着，依家係雙輸，蠢到唔可以再蠢。」她不介意被人拿茶包開玩笑，何韻詩曾WhatsApp她說在杭州也有3個茶包。 ■阿蘇表明網民鬧得好，誠心接受批評。 ■阿蘇自嘲性格衰過人，樣衰改不到。 ■阿蘇自認囂張有私心。