荃灣街市靚仔豬肉佬被讚「楊屋道AK」 網民爭相朝聖：嚟緊一個月每日豬扒肉片

近年逐漸開始有年輕一族於街市工作，日前有荃灣街坊就喺Facebook群組「荃灣人」報料指最近到街市買豬肉時，發現一名金髮靚仔豬肉佬，仲分享二人自拍照，惹起一眾荃灣街坊留言熱議；而呢位豬肉佬更加被網民大讚有明星相。

一名荃灣女街坊PO出與豬肉佬嘅自拍，更寫道：「平時少去買餸，真係冇諗過會有咁靚仔嘅豬肉佬」。合照中，樓主用上「心心眼」表情符號遮住自己個樣，而豬肉佬雖然戴上口罩，但仍然見到佢濃眉、雙眼皮嘅深邃眼睛，加上一頭金髮與反領T-Shirt造型，有別於平日見到嘅豬肉佬；唔少網民都讚該名豬肉佬靚仔，問及樓主到底係去邊個街市，而樓主亦揭開迷底，表示係楊屋道街市附近新村街「鮮味」豬肉檔。

有網民就表示曾經幫襯過該豬肉佬買豬肉，指對方靚仔得嚟，態度好好，仲教埋佢煲湯；又有網民指該名豬肉佬似MC張天賦、MIRROR成員Anson Kong江𤒹生以及羅志祥等男星，認為要會一會佢真人：「決定嚟緊一個月每日豬扒、肉片、金沙骨、豬頸肉」、「楊屋道AK？」、「有冇IG？要Follow佢」、「小鮮肉賣鮮肉」等等；亦都真係有網民已經專程到豬肉檔打算見下該名靚仔豬肉佬，但卻緣慳一面。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！