視后大熱鍾嘉欣已帶囝囝返港 網民猜測可能係為拎獎

《萬千星輝頒獎典禮2021》將於下年1月2日舉行，自各獎項提名名單喺日前公佈後，網民紛紛預測獎項花落誰家。而「最佳女主角」方面，鍾嘉欣（Linda）喺台慶劇《星空下的仁醫》 表現亮眼，被網民視為今屆視后嘅大熱人選。而鍾嘉欣喺今年獲提名「最佳女主角」以及「最受歡迎電視女角色」2個獎項，近日原來佢同囝囝Jared返咗香港，現正喺酒店隔離中，佢仲上載相片到社交網站，隨即吸引唔少網民留言支持佢拎視后。

鍾嘉欣喺2004年參選華姐，獲得冠軍後入行，隨即被受無綫力捧，更被網民捧為女神。多年嚟佢參與過多套大熱劇集拍攝，例如《皆大歡喜》、《法證先鋒》、《溏心風暴》及《珠光寶氣》等等，成為當家花旦之一。自從2016年結婚生子後，佢甚少參與幕前工作，專心照顧家庭。直至上年佢先返香港拍攝《星空下的仁醫》，劇集更成為今年台慶劇，佢喺劇中飾演章以芯醫生，唔少網民睇過佢嘅演出都讚不絕口，認為佢演技有明顯嘅進步、比以往更加細膩，及支持佢榮升視后。

鍾嘉欣入行多年有唔少經典角色，例如《溏心風暴》常在心、《護花危情》喬子琳及《巨輪》卓靜等等，演技多次獲得觀眾肯定，不過其實佢從來未拎過《萬千星輝頒獎典禮》嘅「最佳女主角」，過往佢曾經獲得10次視后提名，可惜都大熱倒灶。今年佢憑章以芯一角成為「最佳女主角」嘅大熱人選，近日仲已經帶埋囝囝返香港，唔少網民除咗支持佢拎視后之外，仲猜測佢今次返香港好可能係為拎獎，唔知佢今年可唔可以打破宿命呢？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！