辰來之筆——最落後愛情故事

【星島日報報道】（作者簡介）李辰安，從事創作二十年，開拓城市感覺派文風，與讀者一起懷舊，穿越香港時空找尋生活新旨情。 男大當婚，女大當嫁。以上兩句話，雖未曾在我現實生活中出現過，但聽得最多是在上世紀六十年代的粵語長片。我想問，男要幾多歲當婚，女要嫁幾多次才是適當。 「阿仔，你已經讀完書，又搵到野做，應該成家立室啦。」 「媽，我依家未有結婚對象，我要出嚟闖一番事業，先至諗呢個問題。」 「表妹咪幾好，你哋青梅竹馬，我想早啲飲呢杯新抱茶。」 「媽，你口渴吖？我斟杯茶你飲先啦。」 「咳咳咳，你都唔知阿媽心意，係咪想激死我吖。」 以上係某粵語長片的經典情節，亦係我的童年陰影，「欽點」呢家野，幾時都不受歡迎，何況飾演表妹的是李香琴，而不是南紅，係人都知無好結果，雖然你一點頭答應，馬上可以令兩位阿媽高興（阿媽同表妹阿媽，即係姨媽），不過，明知表妹不是我杯茶，我又並非表妹那杯茶，他日成婚一定「杰」過杯雪糕紅豆冰（表妹男友之一係麥基），你要我點好？有無理下我感受？ 電影係夢工場，為你做夢，包括噩夢，果然呢位無堅持的男主角，就是在阿媽的不斷游說之下，同表妹結婚，於是後半部變成我的驚慄電影。 自由戀愛又如何？劇情係調轉來。男主角一表人才，有上進心，打扮時尚，認識能歌擅舞的女主角，於是鏡頭一轉，雙雙去雍雅山房High Tea、去馬料水扒艇仔，感情一日千里。 不過，戀愛可以自由，婚事原來要女主角的富豪爹地首肯至得。「閣下係乜水？伯爺做邊行生意？吓，你喺銀行做白領，唔得，我個女係金枝玉葉，婚事一定要門當戶對。」 忘記介紹，男主角係呂奇，女主角係陳寶珠，富豪阿爸係李鵬飛。故事不必細說，你我都知道往下劇情如何發展，我重點想要講的是，經典愛情故事里面，演阿爸或者演阿媽的都是Trouble Maker，總是玩到男女主角氹氹轉，雖是多數喜劇收場，但是過程峰迴路轉，在旁剝花生睇戲就無所謂，易地而處當你係主角就不是那麼賞心樂事。 社會是轉變的，社會是進步的，阿爸、阿媽好快從經典愛情故事中淡出，比較接近現代的男女主角戀愛，可謂百般自由，問題是否沒有了？當然不是，如果沒有你教大家怎樣看下去，你估朋友結婚擺酒之前例播的戀愛Video？一對Free男Free女，敵人就是自己，在毫無第三方的干預之下，這類人最愛互相折磨。有時是女方突然無Mood，瞓醒之後同男朋友講，「我要去非洲做義工」，又或者男主角睇完醫生，知道原來有絕症，得半年人命（其實護士不小心攞錯別人的File的醫療事故），於是留低情書，告知對方要去家鄉尋回一段曾經迷失的往事……以上藉口只是冰山一角，韓劇有更高超想像力。 綜合而論，都是用男主角忽然失憶為戲軌，醒了的「另一個他」發現已對「從前的她」沒有感覺，女的哀莫大於心死，病到就嚟死，男主角才忽然恢復記憶，可惜，今次輪到病入膏肓的女主角再唔認得這位男主角，如是者，喊到天花龍鳳，劇終。 說真的，我非常不喜歡看愛情電影，原因所謂愛情故事很無謂又堆砌，例外的只有一部，就是與我一起長大的前荷里活玉女波姬小絲的成名作《青青珊瑚島》。一、人在荒島，日日唔使做，無工作壓力，專心拍拖；二、最緊要係大家無得揀又無得煩，你唔去留學，我唔會去非洲，更加無阿爸、阿媽的介入；三、電影中男女主角終於被救援人員發現，不過金童玉女都拒絕返回文明，一生一世住桃花源，結局浪漫兼圓滿。 今天想起來，這部青春片仍令我回味，不過，隨年齡長大，關注點有些不同，近幾年我對波姬小絲感覺不如少年時，反而更愛的是大自然。須知有了另一半之外，有了囝囝，一家三口唔使租屋，唔使供樓，居停無限綠化，還有三百六十度全海景，問你點會唔羨慕。今時今日，就算女主角不是六呎高的波姬小絲，換上五呎差幾吋的波姫小儀，我都會講句︰「我願意」。愛情電影能拍出如此引人入勝的境界，恐怕找不出第二部。 回到現實生活，對住一班女同事，近日話題當然是大中華黃金盛女嫁剩得番一個。今次並非物以罕為貴，而是瀕臨絕種者，承受比上太空還大的壓力。我對這班名女人的拍拖新聞不關心但好奇，難明最近的盛女愛情史有乜睇頭，兩個四十幾歲的男女，差不多由香港回歸之日，互相磋跎至今先至話「我們結婚了」，有幾感動呢？ 四十幾歲對四十幾歲，中間沒有青春，只有集體回憶，好難說得上是浪漫，我記得細細個聽收音機，有位詼諧泰斗叫陳良忠，他的節目名為《烏龍廣播電台》，某日講都市愛情故事，開場白係︰「有情人早成眷屬，無緣人成籠蒸熟」，這兩句無厘頭順口溜，其實意思不難明白，指男女有真愛情，一早就拉埋天窗，那些有緣無份，拉拉扯扯的拖友，即使馬拉松下去，結果都是「夾生飯」，是但求其結個婚，繼續另一場無窮無盡的拉扯。 以上觀點我同意，因為睇過張愛玲的《傾城之戀》，明白男女主角可以如此無聊，大玩一場男女鬥智遊戲之後，無喇喇結為夫婦。那位白流蘇其實並未被征服，至於范柳原更加唔知做乜，婚後依然風流，白范二人基本上是水溝油。 女同事話她無可能等到四十幾歲先至嫁，反正她立志要嫁得出，預咗未搵到十全十美的老公都要嫁。聽落女同事幾貼地，作風相當踏實，不過，原來她預咗錯嫁錯着，唔怕離婚，還有嫁幾次的打算（慘，身為同事，可能要飲佢幾餐，做幾次人情）。 以上的現代真實愛情故事，恕我唔識欣賞，講到尾，我都是夢想我是《青青珊瑚島》的男主角，永遠活在一個最原始、最落後的愛情故事。唔使供樓，又唔使煩。

睇更多