食肆老闆應知進退

【星島日報報道】一家成功食肆，有極多「藝術元素」。最基本，當然為廚師功力、侍應服務和裝修雅潔。其實，仍有兩樣，若唔掂，好難令客人返轉頭幫襯，不過，這兩樣，極少客人宣諸於口——洗手間欠私隱及老闆唔識做！前者女廁無問題，反正都係一格一格，必有私隱。男士洗手間則不同，若一排尿兜全無遮隔，你望我、我望你就弊，因為，咁樣「殊殊」點都唔會鬆弛，肌肉必定收縮，屙極唔出，大家尷尬！另外，男性到 咁上下，就會前列腺發大，正是「少時一支箭，老時一條綫（更可能變滴滴仔！）」，你要佢同人排排企小便，滴 滴 ，幾鬼無癮 ！於是，記住囉，下次咪搞我，搵個藉口不再幫襯算數！上述男性心理，女性十之九九不懂，所以，小弟發覺「設計錯誤」男廁，大部分有位女掌門人，完全唔了解男性，尤其老男人的心態也。 好 ，另一類「討厭餐館」，為老闆唔識做！不少食肆老闆，熱情過甚，又或，扮晒老友，不知進退，不分角色。小弟與一群傳媒老友，算是有些微知名度，行走江湖，當然有個別人希望認識，這個無問題。 問題在，有不少老闆，當我 開間房，邊歎美食，邊交換情報爆料時，佢就有理冇理，一是味味菜推門入來詳細介紹（煩到抽筋，為乜唔畀我 自己品嘗？），另一類，更離譜，直情扮晒老友，擔張凳埋 坐低一齊傾（喂！大佬，我 有邀請你咩？ ！），呢類情況，正正是「嬲你唔知，話你唔好意思」，大人大姐，當然唔會出聲趕/請你走啦。 最慘，呢類「熱情老闆」，雖然經營酒家出色，但有個大缺點，為——唔知情唔識趣。好多時，我 已明示暗示請佢出去，例如：「X老闆，你忙呀，唔阻你 ！」哈，佢竟回答：「唔忙唔忙，一齊傾！」你話是否畀佢吹脹？如此情況，再好食都無下次 。 阿碌開咪 曾智華 專欄