全民造星4︱「女版Ian」何佩陽光背後竟有故事?為已故男友參賽望圓歌手夢

ViuTV選秀真人騷《全民造星IV》成為大家茶餘飯後話題，某部份參賽者更已率先彈起。噚晚（10日）播出最新一集，笑容與陳卓賢（Ian）相似，具親和力嘅何佩婷（何佩）就成為焦點，其自彈自唱表現獲評判一致好評，但原來參賽背後有段感人經歷？

何佩笑容親切加上與Ian音樂風格相似，被網民冠以「女版Ian」之稱。何佩仲係本地YouTube頻道「小薯茄」成員程仁富嘅中學同學，曾客串演出「小薯茄」短片，又曾係廣告撰稿員，平時中意busking與創作歌曲，坦言曾想過放棄音樂夢，而呢次參加比賽係為咗已離逝嘅男朋友：「佢一直好支持我做音樂。告別最親嘅人係一件好傷心嘅事，但亦係我人生嘅一個過程。平時都鍾意將自己嘅心情轉換成歌去紀錄。因為自己經歷嘅嘢一定會有其他人身同感受，所以希望自己嘅故事可以安慰同治癒到其他人」。

何佩以原創曲《Unknown》作表演項目，雖然無花俏嘅歌唱技巧，但真摯嘅情感感動評判一致紅燈；朱柏康直言何佩嘅演出觸動到佢：「我係有feel嘅，我係會聽到有經歷喺裡面」，而當奴就話幻想到何佩之後喺女團中嘅定位，何佩最終晉級60強，亦加入許廷鏗（Alfred）隊伍。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！