「千年一遇美少年」道枝駿佑被封木村拓哉接班人 開通IG兩日追蹤者瞬間破百萬

喺日本除咗有「千年一遇美少女」橋本環奈之外，仲有一位男星被指為「千年一遇美少年」及「木村拓哉接班人」。佢就係21歲嘅道枝駿佑，佢長得眉清目秀，笑容溫暖得令人融化，擁有1米80高挑身形，曾奪得由美國電影評論網站TC Candler評選出嘅「2020亞太區最帥百大美男」第9名及上年被日本《新聞週刊》選為「世界尊敬的百大日本人」；道枝駿佑絕對唔係得個樣，喺唱歌及演戲方面亦付出好大努力，屬於全能型藝人。

道枝駿佑嘅明星之路，可以話全靠佢媽媽，因為佢媽媽係傑尼斯男團SMAP嘅忠實粉絲，所以自道枝駿佑兩歲開始就多次幫佢投遞履歷，幸好喺12歲時得到試鏡機會並成功簽約，陸續被安排出演多套劇集，例如喺《BG～身邊警護人～》第二季飾演木村拓哉個囝、《我家的故事》長瀨智也外甥；道枝駿佑亦唔介意為劇集作出女裝打扮、與目黑蓮喺校園劇《被擦掉的初戀》組成男男戀，紅遍全亞洲，人氣爆升。而前年更喺人氣推理漫畫《金田一少年之事件簿》飾演主角金田一，成為第五代金田一。另外，佢仲曾與台灣人氣男演員許光漢合作合攝電影《青春18×2通往有你的旅程》。

至於唱歌方面，2021年11月，道枝駿佑與6名拍檔組成嘅「浪花男子」（なにわ男子）組合正式出道，其出道歌《初心LOVE》首日銷量更逾50.3萬張，相當厲害。身為一位歌手嘅道枝駿佑，原來好鍾意喺浴室大聲唱歌，仲試過喺酒店被成員用手機錄低，並投訴佢太嘈，不過粉絲就覺得佢好得意。

喺較早前，呢位日本國寶級男神終於正式開通官方IG賬號，短短半日就已經有超過50萬追蹤者，兩日就突破百萬追蹤者，截至今日（6月26日）就有超過130萬追蹤者，認真厲害。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！