「地道」星期五影院: 《開心鬼》

就嚟萬聖節，又係去玩去癲去開party嘅時侯。怕多人唔想出街趁熱鬧，亦可以選擇安坐家中睇返套戲！北美地區嘅應節電影，唔知點解好血腥，通常都係隨機殺人、攞住刀槍見一個殺一個。由於本人非常細膽又或者現實太恐怖，所以無辦法再睇太多血淋淋嘅電影，可以揀的話都係笑吓好啲。今日唔介紹香港猛鬼電影……住，睇左啲開心又青春嘅鬼片先。

呢套戲非常青春，青春除左指身體年齡之外，仲可以係第1次嘗試。1984年嘅《開心鬼》就包含左唔少重量級人馬嘅第1次！《開心鬼》係高志森第一套導演作品，第一套就有1000萬票房佳績（而套戲拍攝成本只係100萬！），所以先有後來嘅《富貴逼人》系列同《我和春天有個約會》；

《開心鬼》嘅原創故事，係出自拍過《百分百感覺》、《初戀無限touch》嘅馬偉豪導演。《開》仲係馬第一個有版權費收嘅劇本，話說當年佢仲係中六學生，自編自導自演左套舞台劇《朱秀才》，參加戲劇匯演仲贏左最佳導演，就係咁俾當時做評判嘅黃百鳴買左，改成電影《開心鬼》。

男主角黃百鳴本來位居幕後，佢有份成立嘅新藝城公司出品左好多賣座港產片，包括《最佳拍檔》、《英雄本色》同《監獄風雲》等等。當時《開心鬼》片頭就用「鬼馬橋王」形容佢，因為黃當時已經係行內人都識嘅監製、出品人同老闆，拍《開心鬼》先兼埋做演員，多年來幕前幕後都做得有聲有色。《開心鬼》因為大受歡迎而拍多左4集，一直拍到1991年，如果唔係演「開心鬼」朱錦春演得太好，黃百鳴都未必會做咁多幕前演出，多到會以為佢係由演員變身做監製同電影公司老闆，實情係掉轉先真！

《開心鬼》系列亦都捧紅左唔少女星，好似李麗珍、黎姿、由陳加玲、羅美薇、袁潔瑩組成嘅「開心少女組」等等。

故事講述清朝秀才朱錦春（黃百鳴 飾）因為失意試場、老婆又走佬，受唔住打擊懸樑自盡。百年過後遇上3個中學生林菁菁（羅明珠 飾）、林小花（李麗珍 飾）同顏如玉（林珊珊 飾），今次佢無逃避，反而用法術幫幾個學生妹解決佢地感情煩惱、學業壓力同父母壓力等等問題！

當時位位女主角都係十八廿二春青好年華，不過唔好睇佢係笑片，3位女主角嘅煩惱同而家青少年所面對嘅相差無幾，未成年懷孕、考試壓力等等今時今日仍然上演，可能1984年仲比較開明。要借用「開心鬼」嘅法力就無咩可能，不過唯有相信凡事都有可能，希望在明天囉。