「地道」星期五影院：《飛砂風中轉》

唔知有幾多人被鄭伊健演唱會洗版？又有幾多人有去演唱會現場打卡？有個現象幾有趣，明明唔係鄭伊健fans，但首首歌都識唱！

講起鄭生代表作，除咗把長髮仲有《古惑仔》系列。不過今日唔講《古惑仔》，而係10年後古惑仔重聚嘅《飛砂風中轉》。

《飛》於2010年上映，由莊文強執導嘅黑色喜劇，當時海報宣傳語打正旗號「古惑仔十年重聚」、「無間道班底」。明明唔係《古惑仔》續集，不過海報照用「浩南」「山雞」個朵，無龍頭骨不過有龍尾棍，擺明玩埋「黑社會」！故事講述火腩（陳小春 飾）年少時為保護屋企酒樓免受陀地滋擾而加入和義盛火水（方中信 飾）名下。20年過後，火腩有老婆Nancy（葉旋 飾）有仔女，餐飲事業仲做得有聲有色，大佬火水理財不善有財務問題，去銀行借錢都借唔到，為咗掩飾虧空公款而推火腩接班做下屆龍頭。

同時，黑幫阿姐啤梨（余安安 飾）都想捧個仔燕子文（鄭伊健 飾），其實火腩同子文完全無意接手，前者想繼續做生意，後者想讀書，卻因為一日行古惑終身行古惑，加上長輩嘅壓迫，無奈上演一場龍頭爭奪戰。

表面睇似足社團爭地盤故事，實際講出時代變化經濟轉型問題。大佬火水代表黑道生意輝煌年代遠去，代客泊車得20蚊、翻版無生意因為個個上網唔睇碟、連販毒都唔夠競爭力，街市收唔到陀地因為檔主交數去領匯（即係而家領展），行古惑完全無得撈，無錢搵無飯開，古惑仔都息微！連燕子文都想行正路，入港大讀經濟，做高學歷專業人士搞生意，點睇都比做黑社會、劈友有前途。

其中用黑社會選舉揶揄香港小圈子選舉制度亦非常入肉，另一爭位者鉸剪偉（陳子聰 飾）講「選坐館，選都唔選，造馬呀？」、「和義盛選舉制度源自比例代表制」、「生意每年有超過30％增長，只要環境好，無人理班老鬼（好似查叔嘅在位者）做緊咩」，明刀明槍寸緊香港政局。

講開表面兇狠實質又蠢又傻嘅鉸剪偉，不得一提片中一眾配角非常搶鏡，余安安飾演吸毒吸太多而過份激動嘅啤梨姐；C君、Leo同藍奕邦飾演火腩一班完全零霸氣嘅兄弟；葉璇扮演家庭為重、愛夫心切又姣姣地嘅老虎乸，都演得相當卡通化。最好笑一定係劉浩龍飾演、全世界都知佢係臥底嘅阿仁！

《飛砂風中轉》好笑得嚟又有幾分傷心，無論曾經幾輝煌，跟唔上時代步伐一樣會被淘汰，正如和義盛以至火水哥嘅命運。

亦都證明，冇飯開，真係撲滅罪行嘅最佳方法！