明星效應
一般嚟講,「明星效應」都係正面嘅,但喺即將上映嘅電影《我老婆係明星》中,一對小夫妻就因為呢個效應而風起雲湧。今次「Paco巨星飯堂」,我就邀請到電影嘅導演翁秀蘭(Shirley)同男主角周柏豪,去到位於大角咀嘅特色小店「武館」,細說呢個與別不同嘅明星效應。
![](https://s.yimg.com/ny/api/res/1.2/ZmvbQh9ldp5hhWRbOlskWw--/YXBwaWQ9aGlnaGxhbmRlcjt3PTk2MA--/http://img.eastweek.com.hk/article_multimedia/52998/1_n.jpg)
我帶翁秀蘭導演同柏豪去到位於大角咀嘅「武館」,品嘗令人驚喜連連嘅Omakase,暢談嘉賓們嘅最新作品《我老婆係明星》。
![](https://s.yimg.com/ny/api/res/1.2/K48K4XgvMcn03xOro9untA--/YXBwaWQ9aGlnaGxhbmRlcjt3PTk2MA--/http://img.eastweek.com.hk/article_multimedia/52998/2_n.jpg)
柏豪同心悠今次二度合作,特別有默契。
再度合作
今次係導演Shirley首次獨立執導,上次佢同吳家麗合作執導過驚慄電影《花街柳巷》,同愛情喜劇係南轅北轍嘅類型,Shirley就表明:「我自己就鍾意拍小品多啲,今次都係因為我好鍾意個劇本而做導演。搵柏豪同心悠做男女主角,係因為我睇過佢哋之前合作嘅《小姐誘心》,覺得佢哋好啱做今次電影入面嘅角色,而佢哋亦冇令我失望。」
我請Shirley作出推介,佢就話戲中一場提出離婚嘅鬧交戲,兩人都演得好到肉。柏豪立即補充:「導演要求我哋嗰段有成5分鐘長嘅鬧交戲,要一Take過做晒,於是我哋用咗一個鐘頭時間對稿,當時我真係入晒戲,當正心悠係老婆,好介意佢做唔到老婆應有嘅責任,覺得好傷心同失望。
「因為係從心而發真情流露,我激動到喘晒氣,最後導演真係一Take過收貨,事後全場人拍掌叫好,我都好期待重溫呢場戲。當然,有咁好嘅反應同對手演技有關,心悠嘅母語唔係廣東話,好明顯見佢做咗唔少準備功夫。仲有,咪以為心悠係弱質女子,其實佢都好火爆,鬧起交嚟一啲都唔輸蝕!」
今次係柏豪同心悠第二次合作,佢話:「今次好多嘢我哋都唔使開口講,有時一個眼神就知道大家會點,有默契演起上嚟會好好多。」
![](https://s.yimg.com/ny/api/res/1.2/wztjfzDhQoIA8AZFWi_l4w--/YXBwaWQ9aGlnaGxhbmRlcjt3PTk2MA--/http://img.eastweek.com.hk/article_multimedia/52998/3_n.jpg)
餐廳嘅Omakase菜單每日都唔同,以每日來貨作準,每位收費由$1000-1200加10%服務費不等。飯敍當晚嘅菜式包括呢個北海道牡丹蝦,鮮甜味美。
![](https://s.yimg.com/ny/api/res/1.2/3o4ajaKE_n4mVHNDSGUIGQ--/YXBwaWQ9aGlnaGxhbmRlcjt3PTk2MA--/http://img.eastweek.com.hk/article_multimedia/52998/4_n.jpg)
刺身仲有呢個大拖羅,完全冇筋,入口即溶。
![](https://s.yimg.com/ny/api/res/1.2/m7FpKyKjg2i4mS.ZnKyQHw--/YXBwaWQ9aGlnaGxhbmRlcjt3PTk2MA--/http://img.eastweek.com.hk/article_multimedia/52998/5_n.jpg)
北海道馬糞海膽葱拖羅飯,滋味無窮。
![](https://s.yimg.com/ny/api/res/1.2/dCVojUeHRFOJ4zBm55cX_g--/YXBwaWQ9aGlnaGxhbmRlcjt3PTk2MA--/http://img.eastweek.com.hk/article_multimedia/52998/6_n.jpg)
北海道火炙喜知次壽司 (連肝),配上岩鹽及柚子汁,rich而不膩。
不是男神
戲中柏豪仲一改外界冠以佢嘅男神形象,飾演一位毒男味甚濃嘅狗仔隊,外形不修邊幅,又畫上超級黑眼圈同唏歔嘅鬚根,變身粗魯醜男。佢笑言:「雖然我不嬲都唔覺得自己係咩男神,但係連心悠第一次見到我嗰個造型,都嚇咗一跳,仲話未見過我咁醜!」
劇情講述柏豪為咗配合大明星老婆心悠嘅隱婚要求,成日都要變裝現身,所以整部戲都有多個誇張造型,例如《星星》嘅都敏俊、巴西球星朗拿甸奴、世紀毒男等,但佢最愛嘅係「躁爆Band友」look。「雖然喺戲中係畀老婆逼先至着嘅,但係喺現實中,我就最鍾意呢個look,因為全身又黑又鍋釘,好Rock好正!黑色係我最鍾意嘅顏色,就算平時我唔會咁樣着出街,但拍戲就可以着餐飽,而且一着咗套戲服,就會上晒身!」
柏豪仲話最花時間同心機嘅造型,就係朗拿甸奴look,「我從未想像過自己要扮朗拿甸奴,戴咗假髮、整黑咗塊面之後,成個樣都變咗,好搞笑!拍外景嗰陣,連圍觀嘅人都認唔出係我。」
![](https://s.yimg.com/ny/api/res/1.2/IfWBNnAwbf_ZjhCjnT6rpQ--/YXBwaWQ9aGlnaGxhbmRlcjt3PTk2MA--/http://img.eastweek.com.hk/article_multimedia/52998/7_n.jpg)
![](https://s.yimg.com/ny/api/res/1.2/qAnjNDxptKjrDJkF2_TTww--/YXBwaWQ9aGlnaGxhbmRlcjt3PTk2MA--/http://img.eastweek.com.hk/article_multimedia/52998/8_n.jpg)
![](https://s.yimg.com/ny/api/res/1.2/S.lQhuUh2JbR0cXiDAssUA--/YXBwaWQ9aGlnaGxhbmRlcjt3PTk2MA--/http://img.eastweek.com.hk/article_multimedia/52998/9_n.jpg)
柏豪喺戲中以多個搞鬼造型掩飾身份,有「躁爆Band友」、爛撻撻look及朗拿甸奴look等,顛覆佢予人男神feel嘅形象。
![](https://s.yimg.com/ny/api/res/1.2/2REJlB26Wgr_wt.dD5c5aw--/YXBwaWQ9aGlnaGxhbmRlcjt3PTk2MA--/http://img.eastweek.com.hk/article_multimedia/52998/10_n.jpg)
除咗心悠同柏豪,林德信嘅表現亦備受導演讚賞,呢位影壇新力軍,前途無限。
![](https://s.yimg.com/ny/api/res/1.2/DDEwRKQ6UdpXH_JGy6ObiA--/YXBwaWQ9aGlnaGxhbmRlcjt3PTk2MA--/http://img.eastweek.com.hk/article_multimedia/52998/11_n.jpg)
雖然今次係導演同柏豪首次合作,但係兩位都作出新嘗試,值得支持。
![](https://s.yimg.com/ny/api/res/1.2/Dx7MlvAGeu9S6k7nYQYY9Q--/YXBwaWQ9aGlnaGxhbmRlcjt3PTk2MA--/http://img.eastweek.com.hk/article_multimedia/52998/12_n.jpg)
因為「不時不食」,所以老闆向我哋特別推介活白魚sake,即係將嚟自佐賀縣嘅活白魚,放到sake之中,飲sake時再品味白魚,呢個關東地區流行嘅飲法,當造時份係每年3、4月,絕對係膽量大考驗。
![](https://s.yimg.com/ny/api/res/1.2/lNRHnsrIPeOE_qqr0.p3Mw--/YXBwaWQ9aGlnaGxhbmRlcjt3PTk2MA--/http://img.eastweek.com.hk/article_multimedia/52998/13_n.jpg)
餐廳係隱世小店,老闆兼大廚武哥(右)非常有heart,我非常欣賞!
增進感情
做愛情小品嘅男主角,柏豪嘅愛情觀其實與一般人無異。「愛情要互相信任,如果成日懷疑對方,大家一齊都唔會開心。有時相處耐咗,兩個人由愛情變為感情,都係理所當然。
「我唔抗拒嗌交,輕微嘅嗌交反而可以增進感情,更加了解對方,將關係昇華到另一個階段。我覺得,兩個人一結咗婚就會變成一個單位,所以溝通同步伐都要一致,唔可以有所偏離。」
![](https://s.yimg.com/ny/api/res/1.2/zysxSTU64BvKCPVK_sIPvQ--/YXBwaWQ9aGlnaGxhbmRlcjt3PTk2MA--/http://img.eastweek.com.hk/article_multimedia/52998/14_n.jpg)
鯛魚白子係當造食品,風味同冬季先食到嘅鱈魚白子唔同,各具特色。
![](https://s.yimg.com/ny/api/res/1.2/lnyKw_Qxx11FWeNVYkSZDQ--/YXBwaWQ9aGlnaGxhbmRlcjt3PTk2MA--/http://img.eastweek.com.hk/article_multimedia/52998/15_n.jpg)
兵庫縣赤穗蠔,赤穗除咗盛產鹽,蠔亦係當地特產,蠔味清淡但不失creamy。
![](https://s.yimg.com/ny/api/res/1.2/AYsev5DyvFOCR.ao_wp4bA--/YXBwaWQ9aGlnaGxhbmRlcjt3PTk2MA--/http://img.eastweek.com.hk/article_multimedia/52998/16_n.jpg)
燒拖羅筋爽口彈牙,老闆指呢個部位比拖羅更矜貴o架!
![](https://s.yimg.com/ny/api/res/1.2/NmH_.oNxZgxnprLIoRi67w--/YXBwaWQ9aGlnaGxhbmRlcjt3PTk2MA--/http://img.eastweek.com.hk/article_multimedia/52998/17_n.jpg)
炭燒香魚外脆內滑,仲有陣陣炭香,佐酒一流!
![](https://s.yimg.com/ny/api/res/1.2/Eq8nahkx_gqJX3x2tZfzww--/YXBwaWQ9aGlnaGxhbmRlcjt3PTk2MA--/http://img.eastweek.com.hk/article_multimedia/52998/18_n.jpg)
炭燒福岡華味鳥串燒,包括:雞胸軟骨、雞腿肉同雞頸肉,雞肉嫩滑多汁,一定要試!
![](https://s.yimg.com/ny/api/res/1.2/mfybel3Pp6LjKty5tpgjww--/YXBwaWQ9aGlnaGxhbmRlcjt3PTk2MA--/http://img.eastweek.com.hk/article_multimedia/52998/19_n.jpg)
武館
地址:大角咀博文街10號
電話:62191910/ 53289669
東周網 - 明星效應︰http://www.eastweek.my-magazine.me/index.php?aid=52998