李蕙敏做媽咪養子Michael圓滿人生

恭喜恭喜！李蕙敏終於圓夢做媽咪！一直恨有小朋友的她，昨日開心宣布已完成法律程序，正式收養一歲多的兒子Michael，有感人生終圓滿，每看見囝囝都感動想喊！

現年49歲的歌手李蕙敏（Amanda），與英籍老公Serge Micallef結婚6年來積極造人，經多番努力，配合食療、針灸及中醫調理，試過兩次人工受孕也未能成功，遂打算收養小朋友圓做媽咪夢。今年2月，本報曾拍得她與女傭帶着一名約8、9個月大的小朋友逛街，坐在BB車上的他肥嘟嘟頭髮濃密，樣子可愛，當時Amanda訛稱只是代朋友照顧，但其實他就是養子Michael，但當時因未辦好手續而不能公開。

三口家頻爆笑料

昨日Amanda受訪時，終開心宣布Michael正式成為家庭一分子，是她和老公最佳的生日禮物，她說：「老公10月1日生日，我就10月4日，我哋依家好習慣一家三口出街，都有好多笑料發生。Michael好鍾意模仿大人做嘢，學我啲動作手勢，拎我啲手袋同鞋，好搞笑！見佢一舉一動都好感動，會想喊出嚟，真係好感恩有佢，令我人生變得圓滿。」

大隻B抱到手痛

做過中學教師的她，試過一人湊30個小朋友，湊仔又有冇難度？她說：「佢好活躍，興奮又嗌，忟憎又嗌，都未慣o架！小朋友要24小時照顧，佢又鍾意周圍走，所以改咗個花名叫Monkey。佢對好多嘢都好好奇，活潑唔怕生保，湊佢都好攰o架！因為佢體格幾強健，有成20磅，抱到隻手好痛，但我好想同佢建立親密關係，惟有左右手輪住抱。」

而最大挑戰是帶Michael坐飛機，Amanda回想小時候也經常做一些傻事，笑指Michael勾起她的童真：「其實我本身好有童真，但唔好意思表露嘛！開心好簡單，以純真嘅心去做人同諗嘢，就算喺大人嘅世界，都應該保持純真嘅心。」她覺得湊小朋友辛苦過工作，幸有家人幫忙，故工作不受影響。