生日廣告牌前打卡疑似被警察截查？何啟華Dee＠ERROR報平安︰放心

而家唔少fans都會買戶外廣告牌為偶像賀壽，尋日（8月10日）係ERROR成員阿Dee(何啟華)生日，一班「雯雯」（阿dee fans稱呼）就喺尖沙咀柏麗大道幫Dee哥買起燈箱廣告位祝賀。

fans咁俾面，偶像都會捧場打下卡感謝一番，不過有網民就報稱，尋晚見到阿Dee喺燈箱位置附近，俾4名警務人員截查！

網民嘅照片可見，著住格仔衫嘅疑似阿Dee，晚上戴住鴨咀帽同口罩，喺一間鋪頭門外，連同2名女子被4位警察圍住。而根據阿Dee尋日較早前喺IG story，件衫同相中人一模一樣。唔少網民都想知阿Dee係咪生日流流去自己個燈箱前打卡都要查身份證。

後來阿Dee再喺IG Story post出燈箱打卡相兼報平安，寫道「我只係食完生日飯／打算影張相／最後︰係成功嘅／放心我已在歸家途中／大家都冇事我就真正放心」，似乎冇咩大問題。到夜少少嘅時候，阿Dee再post可愛動物相並形容fans「好得意」，強調「我心情很好／冇受任何影響／生日很快樂／不必感到內疚」，可能佢驚fans因為自己打卡被截查而影響心情。

查實2年前社會運動期間，ERROR兄弟團MIRROR成員姜濤，都試過著黑衫又戴口罩出現銅鑼灣屋企附近時，被警察查身份證同搜袋。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！