【發福回歸】《義不容情》深夜重播勾起回憶 溫兆倫情史多籮籮

由黃日華、溫兆倫、劉嘉玲、藍潔瑛及周海媚主演嘅無綫神劇《義不容情》近日喺深夜時段重播，成功掀起深夜煲劇潮，唔少人捱住眼瞓追睇。劇集除咗勾起無數回憶同共鳴之外，亦令大家勾起對喺劇中大奸角「丁有康」溫兆倫嘅關注。

現年54歲嘅溫兆倫，喺1982年加入港台做兒童節目《香蕉船》主持而入行，翌年就被同事推薦入電台做DJ，84年被唱片公司睇中簽約做歌手正式出道。86年被無綫睇中拍劇開始佢嘅演藝之路，第一套參演嘅劇集處境劇《城市故事》，之後更獲無綫力捧，參演多套劇集，當中包括《義不容情》、《還我本色》、《我本善良》、《老友鬼鬼》、《火玫瑰》及《第三類法庭》等等，奠定佢喺無綫一線小生嘅地位。直至96年，溫兆倫選擇離開無綫向外闖，去台灣及內地拍劇及拍電影。2001年至2005年期間，曾經回巢TVB拍劇，最後一套劇集就係《奪命真夫》。之後，佢就正式離開香港，專注內地發展。

如果要數佢嘅經典角色嘅話，相信大家最深刻嘅一定係《義不容情》嘅丁有康，唔好睇佢外表斯斯文文，其實佢極度自私、壞事做盡、奸到出汁，為咗娶豪門千金小姐馮美欣（商天娥飾），佢可以將懷孕女朋友趙加敏（邵美琪飾）推落火車，結果搞到一屍兩命。唔止呀！佢仲誤殺倪俊傑（劉錫明飾）、殺死養母雲姨（蘇杏璇飾）及激死老婆馮美欣等等，佢簡直將丁有康呢個角色發揮得淋漓盡致，成為歷代大奸角嘅代表。

溫兆倫一向都好有異性緣，入行至今都有幾段情緣。84年與電台DJ李麗蕊相戀，不過可惜戀情只維持咗一年。86年加入無綫拍《城市故事》就同女主角何美婷撻着，不過拍咗兩年拖就分手收場。89年溫兆倫憑《義不容情》丁有康一角爆紅，喺事業啱啱起步呢個時候，佢就與馬來西亞華僑李美玲結婚，不過可惜婚姻只維持4年，喺93年離婚，之後佢哋更因財產問題而對簿公堂。

離婚後公開承認與陳梅馨拍拖，但呢段戀情都只不過維持咗3年。喺96年，溫兆倫打官司向陳梅馨索取拍拖費，最後溫兆倫贏咗官司，但輸咗形象，令佢嘅形象大插水。同年，溫兆倫認識助手潘燕妮，佢哋仲喺02年結婚，但溫兆倫與郭羨妮因拍攝無綫劇集《牛郎織女》時撻着，所以今次都係離婚收場。

溫兆倫與郭羨妮喺04年分手，認識內地女星溫嘉蓉，不過拍咗幾年拖之後都係分手收場，08年及09年會亦分別與秦麗及潘星誼拍過拖。去到13年，溫兆倫好似終於定性，與細20年嘅內地藝人趙庭結婚，15年仲誕下囡囡Anna。而家嘅溫兆倫經常喺微博上載與老婆或囡囡嘅溫馨合照，最近佢仲被傳媒影到中年發福嘅佢帶埋老婆返香港行街街。