釣金龜前科廖碧兒為富二代狠飛癡心陳豪

orientalsunday.hk

更新日期： 2017年2月9日上午5:03

今年38歲的2001年國際中華小姐冠軍廖碧兒 (Bernice)，今日傳出秘撻一名神秘富豪男友，衣食住行通通變得富貴，做富婆歎世界！不過其實Bernice對「錢」途好積極都唔係咩新鮮事，回想當年佢同陳豪拍拖6年，一直未肯承認對方的男友身份。而且一直抱住騎牛搵馬心態想釣金龜！成功搭上「富二代」林忠豪後， Bernice隨即狠飛對自己死心塌地的陳豪，一夜間由形象入屋的乖女變成拜金港女！

秘撻神秘富豪

Bernice年紀其實都唔輕，佢近年不時都對外宣稱單身，日前就傳出佢終於有着落，秘撻一個神秘富豪男友！有男友照顧的Bernice全面升呢，遷離與父母同住的將軍澳寓所，秘密搬到大埔倚龍山莊千萬豪宅，更有一名女司機管接管送。有大水喉射住，Bernice更全力向商界發展，擲千萬在法國買酒莊、中環開酒吧、香港仔開設中央廚房等，果然生財有道！

與陳豪拍拖6年

Bernice 2004年成功私有化當時仍然係神級筍盤的陳豪，雖然從未正式承認過，不過已是圈中公開的一對。男的有型女的索爆，名副其實的郎才女貌，兩人拍劇之餘亦不時以情侶檔出席活動搵真銀。

騎牛搵馬飛陳豪

不過Bernice原來一直抱住騎牛搵馬心態想釣金龜，2010年時被踢爆秘密媾掂「富二代」、李澤楷表弟林忠豪，見對方住豪宅、揸靚車，就一心準備嫁份豪門做少奶奶，於是將拍拖6年、對自己死心塌地的陳豪一腳踢開！作為男主角的陳豪全不知情，都係睇報道先發現「被分手」，該段時間接受訪問時都係一臉憔悴，因情傷而消瘦十磅，不過佢依然處處維護舊愛，話可能係自己做得唔夠好、滿足唔到對方。

嫁入豪門夢碎

與陳豪拍拖6年，Bernice一直拒絕公開男友身份，但對新歡林忠豪卻高調讚好！Bernice好快就入住對方淺水灣的獨立屋，進駐豪宅當女主人。可惜未夠一年，林忠豪已經對Bernice生厭，據知林忠豪多次想媾女明星，但都係失敗居多，偏偏Bernice就以為自己執到筍盤。而號稱身家過億的林忠豪，其實是空心老倌，所住的淺水灣獨立屋其實屬「重慶李嘉誠」張松橋所有，林寶堅尼座駕亦只係舊款車。一個想純粹想媾明星、一個一心嫁入豪門撻Q… 戀情不久後便玩完。