銅鑼灣佔地兩層美食新蒲點！ 日、韓、台人氣餐飲逐一睇

銅鑼灣呢個廣場最近升級改造地下兩層作為全新潮流生活空間！佔地兩層，直通港鐵站接連軒尼詩道夠晒方便，匯聚多間日、韓、台人氣餐飲品牌及過江龍餐廳，想去覓食嘅朋友要留意喇～

日本米主題創意料理 禾日Inebi

香港少有以日本米為主題創作嘅日式料理，會根據季節同時令定期轉換唔同日本米。推介北海道松葉蟹海膽壽司馬天尼，選用松葉蟹同北海道海膽，鮮甜濃郁，加上七星米大滿足。醬燒和牛越光燒飯糰都值得一試，用上口感有嚼勁嘅魚沼越光米，飯糰即叫即燒，外脆內軟，和牛油脂同特製醬汁流於米飯之間，好出色！最後甜品禾米雪糕．脆米芭菲都係必食，用上自家日本米製成，口感幼滑，充滿米香。

泰式惹味沾麵 泰沾面

日式沾麵就食得多，泰國版沾麵你哋又食過未？招牌泰式沾麵有得揀紅咖喱或青咖喱，前者有肉碎、大蝦；後者有雞肉、豬紅等，香料味突出夠晒惹味，而麵條幼身但有彈性，掛汁力唔錯，配埋芽菜、紫椰菜等增添口感又無咁膩。另外招牌船麵、雞肉鑊氣炒河、手打蝦餅同炸魚露漬豬頸肉都係人氣菜式～

班蘭蛋糕專門店 Pandan Man

由網店起家嘅班蘭蛋糕專門店，除咗原味重有多款口味配搭，如芒果、芋頭、美祿、無花果等～想食到最出嘅班蘭味當然要食原味，用新鮮斑蘭葉製作，味道清香。如果想唔同味，可以試吓芒果椰糖椰絲班蘭蛋糕，有新鮮果肉、斑蘭、芒果麻糬，口感同味道都好豐富。

日式傳統地道點心及茶飲 甘味處鐮倉

首次登陸香港嘅日本人氣茶飲店，喺日本已經有32年歷史～餐廳主打日本職人手藝秘製鎌倉蕨餅、淺川園抹茶、生草莓刨冰，以及原創咖啡牛奶。招牌鎌倉蕨餅選日本稀少生產嘅蕨粉加埋秘方製成，食落份外軟糯彈牙，加埋自家製沖繩黑蜜食清甜又唔會膩。蕨餅面層包住黃豆粉，其焙煎溫度比傳統黃豆粉較高，香氣濃郁。店舖1月1日正式營業，而1月5日至7日期間每日設有200份鎌倉蕨餅（5件裝）半價優惠，手快有手慢冇呀～

台中夜市人氣仙草店 八時神仙草

嚟自台中逢甲夜市，主打嫩仙草嘅甜品店！嫩仙草熬煮至少8個鐘，堅持用天然材料、無鹼製作，沿用傳統做法以長時間熬煮釋出仙草膠質，入口係仙草本身嘅回甘，原汁原味。芋泥嫩仙草盛盤有嫩仙草同5款配料，包括芋圓、地瓜圓、珍珠、紅豆同紫米，而芋圓同地瓜圓都係自家製，食得出真材實料。仙草雪花冰都係必試，用嫩仙草冰磚打成，食落好似棉花糖咁入口即溶呀。

另外重有多間餐飲品牌進駐，包括台灣品牌KiKi Noodle Bar、西日fusion菜QUE、精品咖啡品牌%Arabica、網絡人氣熱門鬆餅Grandma's Scones、法式糕點Patisserie Mellowdays、優質平民中菜鍋點、夏威夷Poke Bowl Peek-A-Poke、精品漢堡Burger's Friend Forever以及日本特色甜點SARASEI、人氣本地雪糕品牌Teemtonefai、Kai's Gourmet、正宗韓食2 Kims’ Kitchen、售賣日本特色小食甜點及日本酒嘅関西產直市場、果汁店le jus、RNG Wine、Cooley Oysters及Silk，選擇超多！

文：Yanica
編：Cathy