飲醉酒嘅女仔講咩說話最令男生心動？

嗰啲日韓台劇，唔知點解劇中原本好巴渣潑辣嘅女主角一飲醉，突然間就會同平時形象反轉，變得好可愛，又會無意間吐露咗心聲，咁就令男主角心動啦。咁如果現實中，飲醉嘅女仔講咩最令男生鍾意？

日本媒體「マイナビ学生の窓口調べ」搵咗155名大學男性做調查，發現有4句話係佢哋最鍾意：

第4位：「送我回家」，呢句嘢非常耐人尋味，叫得你送佢返屋企，係咪即係有後續嘅暗示，引起男仔無限FF。

第3位：「喜歡／最喜歡你」，正所謂酒後吐真言，女仔飲到醉醉哋，反而好有勇氣咁同你表白，男仔會覺得咁樣反而有點可愛，但又唔知係咪佢唔清醒而亂講，估唔到講真定假而有點心如鹿撞。

第2位：「想和你在一起」，呢個同上一個差唔多，不過無咁直白，而且好似令男仔覺得被人需要，好似佢真係好想你陪佢多一陣咁，意外地令男仔有好感。

第1位：「我不想回去」，呢個說話就好似想同個男仔過夜咁，非常曖昧，好似突然間今晚有機會咁。又可能佢純粹唔開心，之但係只有你先可以幫到佢，引起男仔嘅保護慾。

不過，呢幾句說話如果係新垣結衣或者石原聰美同你講，就梗係令人心動啦，但如果係魯芬BB／夏蕙BB同你講，我諗你會超級紳士，直情叫埋警察送佢返屋企。

而且，再提提你，真係飲醉嘅女人好恐怖，佢唔嘔落你身上已經算好好，仲想佢講呢啲嘢？醒醒吧，你根本沒有女人陪你飲酒⋯⋯