《中年好聲音》評審周國豐同伍仲衡近月經常拍檔做網上節目,日前二人突然爆料,伍仲衡先提到「有人攻擊我哋節目《中年好聲音》」,而周國豐就話「嗰個都係我好尊敬嘅前輩嚟」。伍仲衡接住就爆呢位前輩「唔找數」,仲話「好多Friend同佢做過嘢,你都知我識幾多人做演唱會啦,個個都識咁滯,同佢做過好多騷,我啲friend唔會呃我」。做過傳媒嘅周國豐好知分寸,就話呢項指控好嚴重,而且「帶定頭盔」話未聽過呢類傳聞。主動爆料嘅伍仲衡立即話「佢唔會唔找畀你吖嘛!同佢做完演唱會啲人收唔到錢,我聽咗十幾廿年」。