甄妮被伍仲衡指控「唔找數」回應指「反覆炒作」再爆「瑪莉亞」借耳環唔還

《中年好聲音》評審周國豐同伍仲衡近月經常拍檔做網上節目，日前二人突然爆料，伍仲衡先提到「有人攻擊我哋節目《中年好聲音》」，而周國豐就話「嗰個都係我好尊敬嘅前輩嚟」。伍仲衡接住就爆呢位前輩「唔找數」，仲話「好多Friend同佢做過嘢，你都知我識幾多人做演唱會啦，個個都識咁滯，同佢做過好多騷，我啲friend唔會呃我」。做過傳媒嘅周國豐好知分寸，就話呢項指控好嚴重，而且「帶定頭盔」話未聽過呢類傳聞。主動爆料嘅伍仲衡立即話「佢唔會唔找畀你吖嘛！同佢做完演唱會啲人收唔到錢，我聽咗十幾廿年」。

到底呢位前輩係誰人？向來敢言嘅樂壇前輩甄妮姐姐，近排都會玩下facebook，早前佢就對《中年好聲音2》賽果發表意見，戥亞軍譚輝智唔抵，又批評冠軍古淖文油膩。而貴為天后嘅甄妮以前當然有喺香港開演唱會，唔通……

伍仲衡言論一出之後，甄妮都好快喺自己地頭連環留言回應，寫道「阿伍台把不正確的舊新聞，反覆炒作繼續加油添醋，一把年紀了仍分不清「對錯」唉！駡都懶得駡你了！套一句『流量比較重要』」、「邊個出聲 邊個就係衰人」、「有意見的人，是不是封面講的項目，也有你的份？？要不然眛著良心，拼命的顛倒是非拼命維護，我不得不懷疑嗯。算了算了，教不好的」、「既被諷為風紀，粗重嘢就交給我做吧！那個台該看，那個台不該看，我會向大家報告！你們都去忙吧！」、「自古以來，尊師重道是基本準則，怎麼到了媒圈就變成罪悪？好 好 好 隨你們吧！小心迴力鏢」、「等你做父母時體會吧！」。

本來同呢場口舌之爭無關嘅肥媽都疑似被拖落水，甄妮其中一個留言話「只有一次交集：瑪莉亞小姐向我借耳環上秀，結果有去無回大丈夫／人品如何請仔細想想／別懶，有証人／果有去無回大丈夫／人品如何請仔細想想／別懶，有証人／也不用還了，送你慢慢用吧」。「瑪莉亞小姐」，會唔會係《中年好聲音2》評審之一肥媽？

肥媽舊年喺TVB致敬黃家駒嘅節目中，演唱聲稱係家駒寫俾肥媽嘅歌，引發肥媽同黃家強各執一詞嘅隔空「開火」，結果肥媽好記性搵埋剪報勝出呢個回合。今次肥媽會唔會又有證據拎嚟回應甄妮呢？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！