寵物小精靈5大迷思

而家落親街，都會見到成堆精靈訓練員喺到玩PokemonGO。其實點解個game咁受歡迎，因為佢係我哋嘅集體回憶囉，小編最鍾意睇就一定係第一代啦。不過睇咗咁多年，其實有無諗過到底小智佢哋食咩肉，明明花草樹木都係小精靈⋯⋯而武藏同小次郎又係咩關係？

就等我哋講吓寵物小精靈嘅5大迷思：

1. 比卡超係男定女？

宜家個個都話要捉比卡超，比卡超咁搶手，到底你知唔知佢係男定女？小智個隻比卡超係男仔嚟，但係要點分比卡超嘅性別呢？咁就要睇佢條尾，如果有個缺口，令到尾部好似心型咁就係女仔，而雌性比卡超仲會有換裝版，換裝比卡超條尾心型部分會係黑色，無缺口好似小智隻比卡超咁就係男仔。

2. 武藏小次郎點解加入火箭兵團？

武藏嘅媽媽曾經都係火箭兵團一員，但喺武藏5歲嗰陣去咗搵夢夢自此下落不明。之後武藏被窮等人家收養，後來想做明星同初戀分手，但最終落選，轉去學做護士又失敗，讀書又被踢出校，仲做咗當地童黨「大家姐」，最後就入咗邪惡集團火箭兵團啦。

小次郎就係富二代嚟，有對怪獸父母，日日逼佢學呢樣嗰樣，加上有個恐怖未婚妻，最終忍受唔住而離家出走。後來讀書識咗武藏，一齊被踢出校就做咗古惑仔，跟住就一齊加入火箭兵團。

3. 武藏同小次郎係咪有曖昧？

睇咗咁耐寵物小精靈，小次郎真係一個大暖男。相比起小智身邊女拍檔已經換咗唔知幾多個，小次郎輸咗咁多次，都無諗過離開火箭兵團，睇嚟佢應該鍾意咗武藏或者係喵喵怪（誤？）。有次武藏失憶，想要為愛離開火箭隊，小次郎雖然好唔捨得，但寧願匿喺草叢自己喊，都要放手等武藏可以得到幸福。其實佢兩個一齊經歷咗咁多嘢，兩個人有啲嘢都唔出奇⋯⋯

4. 喵喵怪點解識講人話？

火箭兵團隻喵喵怪係全世界唯一一隻識行路同講人話嘅非傳說中寵物小精靈，但到底點解佢識講嘢？其實因為喵喵怪原本想溝一隻女喵喵，但係隻女喵喵主人好有錢，食慣歎慣嘅佢就對喵喵怪講「你可以好似人類咁畀到幸福我咩？」拒絕佢。於是喵喵怪好努力咁學人話同用雙腳行路，點知學成之後女喵喵又覺得識講人話嘅喵喵好嘔心，喵喵怪再次慘食檸檬。而喵喵怪因為用盡力氣學人話同行路，所以已經學唔識一般喵喵嘅絕招，喵喵怪真係好可憐嘅兵，嗚⋯⋯

5. 到底小智佢哋食嘅肉係⋯⋯

根據寵物小精靈世界觀嘅設定，幾乎所有嘢都係精靈嚟，動畫入面小智佢哋不時會食肉，唔通啲肉係用小精靈整嘅？？？其實好大程度係真嘅，因為本身Pokemon遊戲設定好多寵物小精靈都帶有動物性，所以真係有食物鏈，好似比比鳥會捉鯉魚王，火蔥鴨因為太好食，被過度捕獵而瀕臨絕種。而據說Pokemon遊戲中有個ミオ圖書館，入面有書記載一啲神話，其中一個就話食完寵物小精靈，將啲骨洗乾淨再放入水，佢哋就會返嚟，「我等住你回來⋯⋯」咁恐怖，都係睇返動畫佢哋食樹果啦。

圖片來源：動畫《寵物小精靈》