張英才逝世︳車婉婉張英才無承認父女關係 婉婉母車綺芬曾涉詐騙入獄 患肝病獲假釋一年後逝世

88歲嘅粵語片明星張英才逝世，令佢同車婉婉再成話題。張英才曾經與婉婉媽咪車綺芬結婚，因此有傳婉婉生父係張英才，但雙方都冇承認過。而婉婉曾表示自己未見過生父﹐張英才逝世後佢回應記者時都只係稱呼對方「才叔叔」。

至於婉婉媽咪車綺芬嘅經歷都唔簡單，單親湊大3個仔女之外，又因為金錢官司被起訴而入獄，後來在獄中發現患肝病獲假釋，但治療年多後終撒手塵圜。

車綺芬十幾歲由內地來港，後來因為追星而到片場，亦因此結識張英才，二人1964年結婚。車綺芬曾以方玲之名加入影壇，主要演配角。車綺芬同張英才育有2個兒子，但佢地最終喺1969年離婚。

有傳車綺芬後來改嫁一位美國華僑，並且喺內地改革開放初期北上做藥材生意，因此搵到第一桶金。而車綺芬同美國華僑亦係離婚收場，之後再有第三段婚姻，丈夫係退休高級督察。

2003年，車綺芬同陳姓丈夫被控向關係友好嘅外籍建築師，以提供高息定期存款為名，誘使建築師將1100萬元電匯至陳氏公司銀行戶口，但後來車綺芬同丈夫將筆錢買入當年市值過千萬嘅舊山頂道豪宅。建築師後來想拎返筆錢，因而揭發事件。法官判車綺芬同丈夫盜竊及洗黑錢共六項罪名成立，判囚7年，更斥責佢哋行為卑鄙，違背友誼。但車綺芬多年後向友人聲稱，自己係被外籍生意夥伴所累而惹官非。

車綺芬在獄中發現自己有腹脹，更多次需要入院治理，遂申請假釋外出醫病，先發現係患上肝癌。2006年6月車綺芬提早出獄後就入往私家醫院治病，但可惜翌年10月，車綺芬因病情惡化逝世，終年57歲。車婉婉同媽咪嘅關係密切，喪母對佢打擊好大，加上當時喺電台開咪，於是導致失聲。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！