61歲錢小豪暴瘦被指似阿伯 與影迷見面攬完女粉絲當堂回春？

八十年代拍過唔少殭屍片嘅男星錢小豪，當年顏值相當高，舊年TVB重播小豪哥30年前同鄭秀文合演嘅劇集《大頭綠衣鬥殭屍》就目識到佢有幾靚仔。

近年錢小豪主打內地市場，拍咗唔少網路電影，吸納到新一批fans。早前有影迷為錢小豪搞咗個見面會，順道同小豪哥做訪問談近況。不過有內地網民cap咗訪問畫面圖片，話錢小豪暴瘦蒼老，十足老伯一樣，甚至形容為「斷崖式衰老」。但有網民就認為錢小豪都61歲，顯老都好正常。

睇返錢小豪fans見面會片段，小豪哥同fans嘅互動相當親密，女影迷一見到「男神」立即大叫，甚至有年青女fans上前攬攬，小豪哥亦相當感謝fans嘅熱情，毫不介意與女粉抱抱。女fans們為錢小豪唱《千千闕歌》兼且讀出fans信，錢小豪感動到眼濕濕。而喺見面會片段所見，被指暴瘦衰老嘅錢小豪兩顴又變得飽滿，唔通係fans威力令偶像回春咁犀利？

錢小豪曾透露近年患有高血壓同有高膽固醇情況，甚至承認同太太丘倩鳴近十年冇性生活。唔知多啲北上見fans會唔會對健康有幫助呢？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！