翁嘉穗老公鄔友正七十大壽拍造型照慶祝 網民提同屆港姐亞軍 當年爆出轟動三角戀

1997年港姐冠軍翁嘉穗同經營海馬床褥生意嘅老公鄔友正結婚25年，二人育有2名兒子，大仔Jason（鄔謨雲）熱愛健力舉重運動更曾刷新世界紀錄，現已由名牌大學畢業並於投資銀行工作。而細仔Kaspar（鄔謨風）早前剛度過9歲生日。

呢期輪到一家之主鄔友正生日，仲要係70大壽。翁嘉穗日前喺社交平台出post，分享鄔友正生日壽宴部份照片。食飯之外，原來鄔友正夫婦仲獲得著名品牌邀請影造型照，相當有面。翁嘉穗繼續晒出多張美照，睇落同多年前當選港姐時冇咩分別，更難得係日理萬機嘅鄔生同樣keep得好，完全唔覺有七十歲！

不過就有網民留言贈慶，提及翁嘉穗同屆港姐亞軍李明慧。當年有報導指，鄔友正嘅七海化工集團係港姐贊助商之一，因而認識翁嘉穗同李明慧。1998年6月傳出李明慧同鄔友正發展中，甚至指二人拍拖十日就傳出婚訊，李更向TVB以結婚為由提出解約。殊不知李明慧到美國工作期間，有周刊影到鄔友正同翁嘉穗約會，李明慧哭訴被人橫刀奪愛，而翁嘉穗同鄔友正就公開承認情侶關係，成為當時娛樂版頭條。後來李明慧被指「敗走」離開娛圈，翁嘉穗同鄔友正1999年結婚，翁更協助老公打理生意。而李明慧就喺美國認識香港名流陳樹渠細仔陳燿陽，二人2003年結婚，婚後育有一對仔女，一家人曾經喺美國生活，近年先至回流。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！