雅虎香港新聞 港產賀歲片得返2套臨時上陣 古天樂拍城寨四子臨危受命 對撼張繼聰主演賭片︳電影LOL
呢幾年戲院市道麻麻，票房收入逐年下跌，港產片首當其衝受影響，連帶向來熱鬧嘅港產賀歲片大戰，今日都傳出爭啲變成「真空狀態」！
有報導指，明年一月底就係農曆新年，但係去到八、九月，都未有港產賀歲片開工拍攝。正當外界以為今次一套賀歲片都冇之際，去到10月終於有公司出手，其中一間當然係「老是常出現」、近年熱心推動香港電影業嘅古天樂旗下嘅天下一，聯同開拍《九龍城寨之圍城》嘅無限動力出品。有得呢個班底，卡士當然同城寨有關。據知呢套賀歲片會有古天樂聯同「城寨四子」林峯、伍允龍、胡子彤及張文傑演出，女角就有王丹妮、梁詠琪、周秀娜等，而去年執導賀歲片《臨時劫案》贏得口碑嘅麥啟光，今年就會為古天樂呢套賀歲片擔任導演。古生日前出席活動時提到，會以城寨班底拍新戲，但題材同城寨無關。
咁古生套新戲係咪賀歲片？主角之一王丹妮早前漏口風話即將參演嘅新戲會比較趕，而麥啟光導演就直認本來會拍古天樂所講嘅故事，但由於出年冇港產片，於是要臨時上陣。而家距離下年大年初一只有3個月多啲，要拍起一套賀歲片相信真係一如王丹妮所講「比較趕」，不過以往全盛時期香港影圈趕貨上大榴期時有發生，應該難唔到一班台前幕後。
至於另一套賀歲片，有傳係由監製多套港片嘅伍健雄執導嘅賭片，演員暫時只係知道有張繼聰，將會喺今個月開鏡，而且會喺港澳兩地拍攝，似乎仲趕過古生嗰套！
本來較早前傳過《闔家辣》班底有意以原班人馬拍新篇《闔家打麻雀》打賀歲檔，並且由《闔家辣》監製執導，但《闔家辣》監製吳君如表示由於劇本未夠好，因此暫時擱置。另外有傳主演《闔家辣》嘅Edan呂爵安本來參演另一套賀歲片，但該片就因事要延期，導致明年賀歲檔突然要「告急」。據知有香港片商本來想引入馬來西亞華語賀歲片當港產作品咁上，畢竟近年大馬片商邀得袁詠儀、歐陽震華等大牌藝人參演電影，但最後因反對聲音而作罷。
更多電影文章
完美物質／危機航線／重生／麵包超人大電影：細菌人與圖畫書的路倫／刺猬／劇場總集篇 孤獨搖滾！Re:Re:／傳說︳電影LOL
小丑內閧！《劊樂小丑3》爆冷打低《小丑︰雙瘋》奪北美票房冠軍︳電影LOL
恐怖片Terrifier 3極核突首映觀眾睇到嘔 癲過《小丑︰雙瘋》 ︳電影LOL
《漂亮朋友》冇俊男掛帥嘅內地同志片成金馬獎最大黑馬 網民形容係中佬版《七月與安生》︳電影LOL
《小丑︰雙瘋》票房失利 難望再創上集10億美元紀錄︳電影LOL
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
