黃霑兒子黃宇瀚罕有受訪 曾因父親名氣大覺反感 成長後同住發現爸爸優點

今年係曾經譜下無數「不朽香江名句」嘅黃霑逝世20周年，TVB早前製作節目《一代鬼才黃霑》紀念呢位才子。黃霑大仔黃宇瀚(Johan)罕有接受訪問，細談同父親相處嘅點滴。

鏡頭前戴住黑框眼鏡嘅黃宇瀚，的確有幾分似霑叔。Johan亦坦言好細個已經畀人叫「霑仔」，起初佢覺得被人叫「霑仔」幾好聽，但後來發現不斷被標籤，「俾咁大個Shadow蓋住，都幾反感，當然係抗拒啦」。

黃宇瀚投身社會後都唔想被人知自己係黃霑個仔，想有自己嘅身份，後來終於學識接受。「人又長大咗，發覺點解我要逃避呢樣嘢呢？所以就欣然接受，加上（父親離世）20周年，你叫我做訪問當然接受啦，我好想人哋記得爹哋添」。除咗爸爸嘅名氣，父母（黃霑首任妻子華娃）分開都令Johan對霑叔感到疏離，甚至有恨意。黃宇瀚喺外國留學時，爸爸同佢會書信來往，霑叔會教Johan中文，仲會用紅筆標記黃宇瀚嘅錯字。後來黃宇瀚回港，同霑叔生活過一段時間，竟然冇「相見好同住難」，甚至對爸爸改觀。「佢其實係一個好好嘅人，佢心地好好、好大方，對我直頭係一個好好朋友，亦師亦友嘅朋友。」

黃宇瀚眼中嘅爸爸勤力而且愛書，能夠徹夜不眠睇書，外人眼中嘅鬼才，唔係單靠天份。「佢可能20分鐘作到一首歌，但佢花喺做research、蒐集及思考各方面嘅時間係好耐。」霑叔亦不時鼓勵Johan睇書，仲會介紹書俾個仔睇，而家Johan睇到爸爸喺書上寫下嘅語句都會感動。

黃霑同華娃育有三名子女黃宇瀚、黃宇文及黃宇詩，黃宇瀚同霑叔一樣投身廣告界，曾經喺廣告公司同媒體機構任職高層。