56歲林穎嫺美國回港罕有現身 18歲大女被力邀選華姐

1987年港姐季軍林穎嫺Wing曾於娛圈短暫發展，1989年決定到美國修讀會計，期間曾回港拍劇。後來Wing決定留喺美國生活，1999年同外籍男友結婚並移居美國。二人婚後育有三名子女，而家大仔Teddy20歲、大女Michelle同孻女Julie分別18及16歲。

林穎嫺近年經營自家youtube頻道之餘亦有寫書，早前佢就為新書回港宣傳，並且帶埋三個仔女返香港。當年林穎嫺嘅爆牙加上燦爛笑容，而家嘅佢依然keep住呢兩樣特色，加上凍齡外表，邊睇得出仔大女大先！

林穎嫺喺facebook分享咗好多今次旅程嘅照片，包括參加TVB劇集製作人劉家豪嘅退休晚宴，Wing仲話係為咗呢次晚宴改機票。

林穎嫺仲帶仔女去唔同景點遊覽，當然有指定動作嘅上山頂睇夜景。Wing三個仔女都係混血兒，輪廓相當突出，當中18歲大女Michelle顏值甚高，兼且入讀美國名校加州大學洛杉磯分校(UCLA)。Wing都話唔少人叫大女參加美國當地嘅華裔小姐選美，佢作為媽咪就表示冇所謂，因為Wing認為參加港姐係人生轉捩點，而且入行後識到好多幕前幕後人，而家都仲係好朋友。同林穎嫺同屆嘅港姐冠軍楊寶玲Pauline都係定居美國，Wing同 Pauline不時都會見面。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！