《中年好聲音》曹敏寶傳介入梁浩銓婚姻後首現身 直指與對方冇聯絡 提老公即情緒激動

TVB綜藝節目《中年好聲音》第一季參賽者梁浩銓喺今年初驚傳婚變，被指已婚人妻曹敏寶（Mable）介入而導致與懷孕老婆分居。梁浩銓喺爆出緋聞後將社交平台帖文清空，並承認與老婆現時處於分居狀況，不過佢就強調同曹敏寶無關，佢哋只係好朋友，而曹敏寶則疑被TVB雪藏。直至噚日（25日），佢出席「香港動漫電玩節2024」預覧，係佢傳出緋聞後首度出席公開活動，直指與梁浩銓已經冇聯絡。

曹敏寶噚日現身「香港動漫電玩節2024」預覧，佢表示自己將會同朋友合作拍片介紹新車。另外，佢亦默認被TVB雪藏，表示自己有段時間需要沉澱下，同埋陪多啲屋企人，只係時機，同時自己要向好方面諗，佢強調自己同公司有交流。

有指因呢段不倫緋聞令「中1生」對佢疏遠，佢就話可以做嘅嘢都做咗，《中年好聲音》係講團結精神，唔想破滅。除此之外，有指事件係「中1生」爆料，佢就話近期自己都係將時間放喺珍惜自己嘅人身上，其他嘢就唔清楚，同時佢亦都唔願意相信呢個傳聞，因為佢視「中1生」係朋友、家人。

同時，佢仲話自己同梁浩銓已經冇聯絡，不過當講到老公嘅時候，佢一度情緒激動要暫停數分鐘先可以繼續做訪問。佢話老公思想成熟同好堅強，一路都係關心佢嘅情緒同埋叫佢唔好放棄夢想。

另外，提到同是「中1生」嘅龍婷與大22年資深演唱會製作人兼有婦之夫丘亞葵疑撻著，但TVB發聲明澄清，同曹敏寶當時嘅緋聞處理手法好唔同，咁佢就表示自己唔方便多講，只係話佢同龍婷係好朋友，私底下亦有慰問對方。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！