黎振燁偷食朱智賢4年後首度受訪 有諗過要離婚 太太支持繼續追演員夢

4年前，前香港先生黎振燁同前港姐朱智賢因拍攝新劇《食腦喪B》撻著，被傳媒撞破揸車去僻靜處密會「食蛋糕」，兩人本來受TVB推上位，但因為事件被雪藏，而且發展各異。朱智賢休息一年後有劇拍，但去年依然決定離巢。至於男主角黎振燁事發後一直潛水，收埋4年後再接受專訪，原來佢近期先至同TVB約滿，並打算重新出發。

黎振燁「出事」前太太正在懷孕，而佢喺成為新聞人物後試過8個月冇出街，最多都係陪初生嘅囝囝去健康院。黎振燁解釋，當時因為覺得未準備好，情緒亦唔穩定，就連新聞同手機都唔睇。雖然「食蛋糕」事件影響太太，但黎振燁喺訪問中多次強調太太對佢嘅鼓勵同支持，令佢終於肯出去，而且陪佢睇劇本等。

黎振燁同太太中學時代就認識，黎得知被傳媒影到「食蛋糕」之後就向太太自首，對方反應係錯愕而且戥佢可惜。黎振燁話太太即使係受害人，都先處理佢嘅情況，但佢都坦言有諗過可能搞到離婚收場。經歷風雨後黎振燁當然更珍惜眼前人，佢同太太都明白小朋友終有一日會得知爸爸嘅舊事，於是佢地決定等小朋友懂事就坦白交代，亦等個仔學會承擔後果。

停工4年，黎振燁靠積蓄維生並主力湊B，過住簡單節制生活，最緊要小朋友有得食。一直有傳黎振燁被TVB解約，但實情仍有約在身，有監製搵佢開工甚至連高層曾勵珍都肯見佢，但因為自覺未準備好而推卻。可是到佢覺得可以嘅時候，公司就未再有安排。而家黎振燁成為自由身，仍然希望留喺圈中繼續追尋演員夢，創造奇蹟，亦唔介意由低做起。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！