方力申內地電影《億計劃》扮女人首日票房僅收74元人民幣 網民分析三大原因

方力申於TVB熱播劇集《逆天奇案2》飾演生物學教授角色，佢就透露由於教授深受學生歡迎，監製想佢瘦一點，所以為角色減肥，戒食澱粉質食物、甜品、水果及酒精飲品等等。方力申為演好角色不惜犧牲，除咗《逆天奇案2》，佢喺近日上映嘅內地電影《億計劃》（原名《菲比尋常》）亦放開靚仔形象上山下海，更扮女人搞笑演出，不過首日票房僅收74元人民幣（約82港元），慘不忍睹。

內地電影作品《億計劃》由方力申、姜瑞佳、雪村及苑瓊丹演出，講述齊飛（方力申飾）創業失敗，公司面臨破產，向好友求助無果後，企圖參加一場億萬獎金遊戲以挽救公司，殊不知對方係不懷好意嘅一場詐騙，幾經波折後又偶遇真正犯罪團伙，一場激烈嘅鬥智鬥勇後最終意外收穫愛情。對於票房仆直，唔少網民都批評方力申戲屎，又指因為內地人唔係好識佢，並無號召力：「其實內地有幾多人識佢？（方力申）」、「完全無號召力，仆直好正常喎」、「他做戲表情得一個樣」、「佢最高票房既戲，都係同Stephy一齊拍既」等等。不過，據內地媒體報導，真正嘅原因有機會係因為《億計劃》早於2019年殺青及計劃於當年暑期檔期上映，但最後遭雪藏，同時《億計劃》早於上映前，網絡上已有盜版可免費觀看。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！