近期《飛砂風中轉》嘅宣傳攻勢，鋪天蓋地。哈哈哈！計我話，有麝自然香，有伊健同小春再續14年前古惑仔之緣，集體回憶就一定唔愁冇捧場客！

為咗表示我嘅支持，今晚我就帶伊健、同喺《飛砂》飾演佢媽媽嘅余安安，到位於K-11嘅「浜Hama」大歎標準日本料理，當中包括關東式嘅特色菜式。兩位嘉賓原來係日本料理嘅fans，真係啱晒嘴形！

「浜Hama」嘅大門設計極具懷舊東洋風情，我哋身後嘅浮世繪玻璃屏風，襯埋門外嘅手繪燈籠，小橋流水，特別好feel。

顛覆傳統母子情

話得係鋪天蓋地嘅宣傳攻勢，我相信你哋大多睇過安安喺《飛砂》嘅金毛造型，今次佢破天荒飾演伊健媽媽，原來都經過一番內心掙扎。「我知道我嘅形象一向畀人一種靚嘅感覺，但係我一直都搵緊一啲突破。其實之前喺《我要成名》入面，我都做過一個冇咁靚嘅茄喱啡阿頭，今次就更加豁出去。當導演（莊文強）搵我飾演呢個『啤梨姐』嘅時候，我已經好鍾意個角色，唯一要過自己嘅心理關口，係飾演伊健嘅阿媽。

你見到伊健出晒力助我一臂，就知個雜錦刺身份量十足啦！

「不過，後來我諗，呢個角色10幾歲就出嚟玩，畀人搞大個肚，就算個仔依家30零歲，我都係40幾啫，所以都有說服力嘅。」

安安一說畢，「阿仔」伊健立刻接上，「本來我個造型係要留鬚㗎，為咗就番安安姐，所以就改到依家出街嘅版本。而且喺拍呢部戲之前，我同安安姐未合作過，第1日一埋位，就講佢唔畀我讀書，要我選坐館，然後我哋就好激烈咁炒咗一鑊，我哋拍嘅時候，所有嘢都係一埋位就到位，都幾神奇！」

哈哈哈！兩位都係好戲之人，一合作就有火花，一啲都唔出奇，我有留意佢哋嘅造型，伊健就貫徹一向嘅型仔形象，反而安安一頭金毛，真係一反平日性感嘅lady形象。

「個金毛頭係我拍攝嘅時候漂嘅，初時美術指導話就咁畫就OK，但係畫出嚟嘅效果始終冇染咁好，而且次次開工都要嘥兩個鐘去整頭，亦都好花時間，所以我就提議真係染咗佢啦！我個女見到我個look，仲話未見過我咁型！」

哈哈哈！安安渾身是戲，襯番電影「出得嚟行，預咗要玩」嘅口號！但係今晚，我哋難得喺「金牌飯局」共聚一堂，梗係「有得飲先好玩」啦！

不約而同愛日菜

伊健同安安都係懂得欣賞美酒嘅朋友，而呢「兩母子」同時亦係日本料理嘅fans，伊健好雀躍咁話：「我好鍾意食日本菜，之前因為工作喺日本住過一段唔短嘅時間，可以試到好多唔同類型嘅日式料理，壽司、爐端燒之外，好似今晚某啲菜式嘅關東式煮物，都係我嘅心水。不過，我好貪心㗎，不論中國菜、西餐，最好樣樣都有就仲正！」

無巧不成話，安安喺飯局前先同朋友講起日本料理，「我欣賞日本菜，係因為日本人好有心思，一樣食材可以有多種煮法，而且所有嘢都配合得宜，仲好健康添！」 既然兩位都咁喜歡日本料理，就證明我今晚冇揀錯「浜Hama」作為飯局地點啦！歎完前菜同魚生，正好係我哋碰杯嘅好timing，乾！

安安同伊健對日本料理同樣喜愛。

伊健首談導演夢

乾杯過後，侍應端上招牌菜安格斯牛柳石燒，伊健一邊夾牛柳畀「阿媽」安安，一邊大讚《飛砂》導演莊文強，仲訴說埋自己嘅大計，「導演今次由劇本、選角，都計算得好準確，我同小春夾慣夾熟，好多嘢我哋一個眼神、一個小動作都已經get到大家諗咩；而安安姐就更加係一個驚喜。

「如果我做導演嘅話，劇本題材嗰方面我已經ready，係一個發生喺3年零8個月期間嘅古仔。我一直諗如果將一啲現代古惑仔嘅思維，apply喺嗰段時期嘅一班人身上，出嚟嘅戲劇感一樣係好強。」

哈哈哈！想像可以無邊界，我期待伊健付諸實行嘅成果，先祝你成功，乾！

安安同伊健都大讚對方係好對手，唔係嘅話，飯局嘅氣氛又點會咁warm？

有兩位好飯腳、好酒腳，今晚嘅飯局又點會有冷場？

識/惜酒之人伊健對餐廳嘅house wine都要研究一番。

自備環保私家筷

伊健同安安「兩母子」，除咗口味相近之外，佢哋都大力支持環保，呢晚伊健就帶埋自己嘅私家筷子嚟飯局。而安安都有用私家筷嘅習慣，佢哋異口同聲話，「用私家筷可減少用木筷子，慳番啲資源！」

唔好以為伊健攬住佢嘅背囊，就以為呢張相影得求其，其實我要話你知佢真係即席喺背囊拎私家筷（右圖）出嚟裝嵌㗎！

東周網 - 《飛砂》母子啱嘴形︰http://www.eastweek.my-magazine.me/index.php?aid=6841