HOY TV《去邊啊Do姐》首播 兩大處女座同遊日本互窒 林家謙口花花撩Do姐浸溫泉

HOY TV全新旅遊節目《去邊啊Do姐》由鄭裕玲（Do姐）主持，聯同五位人氣男神林家謙、魏浚笙（Jeffrey）、Tyson Yoshi、 洪嘉豪及應智越（細貓）玩轉歐亞，由9月4日起，逢星期一至五晚上8時30分於HOY TV 77台播映。

今晚（9月4日）播出的第一集，率先由Do姐、林家謙兩大著名處女座去到日本立川行市集、入住特色溫泉酒店兼食靚和牛。Do姐帶家謙到一間酒吧餐廳試菜，又請家謙飲Vodka。餐廳內有一部全球限定18部，價值2千萬日元的鋼琴，家謙非常識做，即席彈奏一曲，指名「送俾現場其中一位處女座」，Do姐一向欣賞家謙才華，當然聽到心心眼啦。

不過林家謙一路上難掩其「家mean」腹黑本性，雖然笑容滿面，不過嘴巴就好大膽，不時偷偷「窒」Do姐，二人入住特色酒店時，Do姐對環境相當滿意，而挑剔的家謙面無表情回覆「OK嘅」，Do姐亦都反擊「奄尖聲悶，呢啲咁嘅處女座...」，不過Do姐都不忘補返句「女處女座同男處女座唔同嘛」。二人參觀酒店的室內溫泉時，家謙口花花邀請Do姐一齊浸溫泉，仲表示「節目組同我講可以同Do姐浸溫泉」，認真大膽。