黃家駒墳墓被毀 涉案光頭男曾「狼吻」炎明熹 另一男子係薛影儀「亞視高層」新郎

樂隊 Beyond 主音黃家駒的墓碑早前被人刑事毀壞，警方周日拘捕 2名分別 15 歲及 23 歲男子，涉刑事毀壞，案件已交由刑事調查隊跟進。從網上流傳的影片顯示，一名男子首先用液體淋向墓碑，然後提起墓碑前的花束，並吃花束的花紙。該男子之後用筆墓碑寫上「社會破壞者」、「光頭Bob」等字句，再用腳不斷腳踢向黃家駒的相片，期間不斷講粗口。

2名涉案男子原來早前都有其他出位行徑。光頭男去年喺炎明熹代言嘅連鎖快餐店拍片，先向其中一家分店內擺放嘅Gigi 真人1：1廣告牌瘋狂爆粗，再對Gigi（個廣告牌）大叫「我而家就猥褻你！」，然後隨即「動手」，強吻Gigi（個廣告牌），由頭鍚到落去……「非禮」完，光頭男又大肆擾攘，仲對住路過嘅婆婆爆粗摟打，但係婆婆相當淡定回敬一句「乜x嘢啫0靚仔」，仲立即舉起拐扙。光頭男似乎估唔到對方咁老定，當堂笑晒口扮無嘢，洩咗道氣。

光頭男之前做過唔少搏上位行徑，包括喺尖沙咀碼頭飲海水、港鐵車廂爆粗、騷擾店員，更被指同另一位網紅劉馬車有交情。

而另一被捕23歲男子據報姓葉，早前前亞視一姐薛影儀40歲生日，阿儀喺一班好友做姊妹陪同下舉行「婚禮」，而新郎哥好似犯人咁笠住個紙袋，上面寫住「亞視高層」。葉男之後喺個人IG自爆佢就係「亞視高層」。此外，習武嘅葉男據知曾於ViuTV節目《MM730 - Auntie 妳好》表演。而葉男不時分享追星照片，早前就去話TVB劇集《神耆小子》嘅宣傳活動同演員「集郵」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！