韓國空姐網紅因意外左邊頭骨被切除 樂觀性格勇敢踏上復康之路

Woozakka（우자까，音譯：禹恩彬）原本係一名空姐網紅，可惜因年初一場嚴重意外，除咗導致左邊頭骨被切除之外，亦被醫生診斷將來有機會出現語言障礙、認知障礙、及聽覺障礙等等。面對呢個人生巨變，Woozakka並冇氣餒，憑著樂觀性格及驚人鬥志，勇敢踏上復康之路。

根據韓國媒體報道，現年34歲嘅Woozakka，喺YouTube上載影片，分享自己嘅近況。佢表示今年年初（1月27日）發生咗一件嚴重意外，同佢正準備出席一場關於空中服務員嘅演講時，喺行人路上跌倒往後摔倒，由於頭部及背部重傷，需要即時送院做緊急手術，醫生將其40%左邊頭骨暫時切除保命，並將頭骨保存喺冷凍庫內，待下次手術將頭骨放回原位。

性格樂天嘅Woozakka，除咗喺影片中面帶笑容，仲勇敢地脱下帽子，展示自己現時嘅容貌；佢仲話自從發生事故後，佢每一次照鏡都好痛苦，而心情亦複雜；同時頭痛亦有所增加。另外，因為喺手術前唔可以再受傷，所以佢都會戴著頂帽。

喺削除左邊頭骨後，Woozakka努力做唔同嘅復康治療，佢話而家有時會出現語言障礙，及偶爾會詞彙貧乏同將稱呼混淆，例如佢試過將媽媽改錯做爸爸，所以佢而家要做筆記同埋睇好多中小學生嘅教科書，去重新認識單字。影片一出，唔少網民紛紛留言給予支持及鼓勵，希望佢可以盡快康復。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！