芷珊約您丨許志安形容「安心事件」係一輩子嘅傷疤 感謝太太鄭秀文寬恕

TVB節目《芷珊約您》走訪唔同歌手嘅演唱會，尋晚播出一集嘅主角係許志安，除咗有安仔早前準備巡迴演唱會嘅片段之外，安仔仲同主持黎芷珊傾起2019年「安心事件」後點樣走過艱難日子。

2019年有傳媒刊出許志安同黃心穎喺的士上親熱嘅片段，事件曝光後2位主角事業直插谷底，即使事隔5年都難及當年。黎芷珊形容2019至2022年係許志安事業真空期，許志安坦言事件對佢事業影響好大，形容當時係人生最痛苦最黑暗階段，「嗰時睇嘢冇顏色」，仲話當時連自己都冇勇氣面對。許志安同時直言事發後對事業都冇期望，形容「安心事件」係「一個錯誤，一個錯失」、「一個一輩子嘅傷疤，成為提示我做人嘅方向」，停工期間除咗睇書以外，安仔重拾彈琴同結他嘅習慣。

出事後許志安有幾個月冇出過屋企，直至有日同太太鄭秀文(Sammi)講佢想跑步，安仔先至首次踏出家門。訪問入面安仔多次提起Sammi喺「安心事件」後對佢嘅支持，例如鼓勵佢復出，又或者對演唱會曲目提出意見，而且給予好多陪伴。許志安認為Sammi好在意佢內心感受，出事後佢地傾咗好多偈，而安仔自言學識聆聽。「可能以前冇聆聽得咁多，會覺得……你（Sammi）搞得掂」。黎芷珊問到佢地夫婦點面對「安心事件」，安仔好直接答「寬恕」。安仔認為而家同Sammi嘅關係好好，又希望可以繼續好落去。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！