美食新聞報道丨陳嘉倩重返TVB任主播 網民：應該走頭無路先返娘家

TVB Plus全新節目《美食新聞報道》由4位「美女試食員」倪嘉雯（Carmen）、黃嘉雯（Carmaney）、廖慧儀（Jessica）及伍倩彤（Gillian）主持，前新聞主播黃婉曼、蔡雪瑩、陳嘉倩於節目中擔任主播，介紹香港美食。3位前新聞主播坐廠報道美食，都令佢哋勾起昔日報新聞嘅回憶，陳嘉倩更專登喺衣櫃好深嘅位置搵返以前嘅主播衫諗住喺節目中再著返，其中佢就以白色長袖薄紗上衣出場，大曬白滑香肩派福利，而且報道期間表現跳脫。

33歲陳嘉倩2014年加入TVB擔任新聞主播，長相甜美，因而被網民封為「嘉倩BB」。2017年宣布離巢並重返校園修讀碩士課程，同年回歸香港電台主持第一台氣候資訊節目《大氣候》；2018年開始轉戰幕前，除咗接拍廣告，亦為ViuTV主持旅遊節目《嚮導玩》。陳嘉倩於2020年至2023年簽約ViuTV及Makervilla，工作量大增，包括主持《娛樂ON AIR》、《蟲前有10個女仔》、《最後一屆口罩小姐選舉》、《辣王傳》、《賭命夫妻》等節目，又曾孭重飛擔任2021年東京奧運主持，不過就被網民質疑其主持功力，被指喺節目到做花瓶角色，齋坐無貢獻亦無做足資料搜集。另外，陳嘉倩亦曾於真人騷《學神出沒注意》接受駕駛大挑戰，不但發生停車場內撞欄、彎路險撞巴士等情況，被網民鬧爆「公路炸彈」，網民更直斥陳嘉倩又嘈又做作又無行車常識等等。

對於陳嘉倩今次重返TVB，部分網民表示支持，但部分網民估計佢撈唔掂所以返TVB：「離巢一定叫猛將，咁回巢嗰啲叫？」、「又撈唔掂，又拍唔到大碼頭，唯有頂硬相」、「陳負面新聞唔少，形象已崩壞，見到佢對住鏡頭笑，已經感覺虛偽，完全唔想睇佢！」、「個個走完又返黎」、「喺ViuTV冇嘢撈，最後又要返TVB！」、「陳嘉倩應該走頭無路先返娘家做阿二」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！