雅虎香港新聞 《魔法壞女巫》玩具包裝印錯AV網站網址 Mattel致歉︳電影LOL
小編呢份工，原來好緊要。做編輯最緊要係好眼力同埋疑心重，咩都check一餐，咁先可以阻止低級錯誤發生。電影《魔法壞女巫》(Wicked）最近進行宣傳，點知爆咗單花生料，正正因為冇人check嘢而出事。
話說呢套以《綠野仙蹤》改編嘅電影，乘勢搵玩具品牌推出以2位女主角Cynthia Erivo同Ariana Grande造型推出公仔。點知眼利網民（點解永遠有「眼利網民」而冇「眼利編輯／marketing」呢？）發現，《魔法壞女巫》主題玩具包網盒上嘅電影網址，唔係《魔法壞女巫》電影官網WickedMovie.com，而係漏咗movie個字。最大鑊係印錯嘅網址，咁啱都係「電影網址」，不過係專門製作唔適合小朋友睇嘅電影片商……
Mattel星期日即刻出聲明道歉，話已經即時採取行動補救，並提醒家長包裝盒上面條link所指向嘅網站唔適合小朋友，建議掉咗個盒或者搵辦法遮咗佢。更妙嘅係，嗰間冇端端捲入事件嘅AV片商，原來同候任美國總統特朗普有啲淵源。因為「阿侵」今年被紐約州政府告佢以文件掩飾向AV女星Stormy Daniels俾揞口費，而侵侵同Stormy Daniels邂逅嘅高爾夫球賽，正正係由呢間W字頭公司贊助。
呢度始終係電影欄目，講返啲電影嘢埋尾。《魔法壞女巫》以《綠野仙蹤》中「好魔女」Glinda同綠女巫嘅故事，Elphaba因不尋常綠色外表而經常被誤解，漂亮的Glinda則相反甚受歡迎。二人在大學相識，並結下看似不可思議但深厚的友誼。遇到綠野仙蹤後，她倆友誼走上分叉路口，從此的人生道路截然不同。電影於北美11月22日上映，主攻美國感恩節假期﹐香港就會喺21號上。
更多電影文章
《變形人魔》35年後再拍新續集 人體混入烏蠅基因成核突驚慄片經典︳電影LOL
《孤疑》落實拍第3集 女主角已經27歲點扮不老症？︳電影LOL
美國大選前夕 「紫天椒」Chloe Moretz出櫃撐賀錦麗 奧斯卡提名墮胎短片免費睇
《機動戰士高達》荷里活真人版電影 講足6年終於落實導演人選 傳明年開拍︳電影LOL
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
