57歲鄧兆尊自爆曾被陳彥行追求 高層珍姐出手撮合兼見家長

57歲鄧兆尊同時與3位紅顏知己交往，被指係「現代韋小寶」。日前，鄧兆尊亮相於由江美儀、吳家樂主持嘅節目《娛樂好好玩》，大爆曾被陳彥行（行姐）追求，更指對方媽媽見到佢就流晒口水。

鄧兆尊與行姐合作拍攝經典劇集《皆大歡喜》期間朝夕相對，因而傳出緋聞；多年來，鄧兆尊艷福無邊，行姐就一直宣稱單身，但今年7月有傳佢於3年前秘密產女。事後，行姐承認秘密結婚及產女，指另一半係簡單低調嘅圈外人。鄧兆尊於《娛樂好好玩》被問到有否追求過行姐，佢就回答指一個女藝人都冇追過，又指入行時曾答應爸爸不能與圈中人拍拖。不過，佢就爆出指行姐有少少追求佢：「行姐有冇追我，有少少嘅，行姐睇住我都係咁講，嗰時有一個節目同思浩做嘅，好似係亞視，『依家畀機會你再追我一次，你追唔追？』我話唔追。佢都叫少少追過㗎，《皆大》嗰時，嬲過我㗎，因為我同佢做夫妻，但係現實上我冇同佢做過夫妻，佢就嬲我。」鄧兆尊認為行姐係好女仔，但佢拒愛嘅原因係當時佢已有兩個女朋友：「我唔係唔接受佢，行姐好女仔嚟，係我嘅睇法，我睇落去好似幾好女仔啦。有樣有身材，個人又傻傻地，好難得㗎嘛。只不過嗰時我已經有兩個女朋友啦嘛。」

鄧兆尊又爆料指當時連無綫高層曾勵珍都想撮合佢同陳彥行合照，分享自己收到珍姐電話，叫佢即刻過嚟銅鑼灣，指唔可以抗拒珍姐，亦見到行姐阿媽流晒口水望住佢，笑指曾勵珍係媒人。對於種種回答，吳家樂指佢唔尊重行姐，鄧兆尊回應：「行姐我好尊重，唔尊重食咗佢啦，我就係因為太尊重佢，當佢女神咁供奉，唔敢褻瀆佢。我放生佢，要得到佢幾咁易呀，易如反掌」。

另外，江美儀問到鄧兆尊擇偶類型，佢就回應指肥嘟嘟即可，當被提及上圍要否豐滿，鄧兆尊表示其老婆以前僅「A cup」上圍，但交往後身材愈來愈好。有女藝人又同鄧兆尊講叫佢幫吓佢手捽大佢（上圍）：「我話你都傻，捽大佢，你估咁容易呀，趙小姐呀」，對於趙小姐身份，網民議論紛紛。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！