港女又萬歲｜貝依霖自揭14歲被已婚男追求 2大特徵吳浩康秒知當事人身份

由田蕊妮監製及主持嘅《港女萬歲》今年1月於《喱騷》上架，大談港女話題，反應叫好叫座。田蕊妮隨即決定開拍第二季《港女又萬歲》，節目組籌備近半年，與逾百個藝人、KOL及素人會面，探索更多具爭議性嘅人物及更爆嘅話題。日前（18日）《港女又萬歲》開播，首兩集以「港男講女」為主題，邀請到吳浩康、Kolor主音Sammy和廿四味阿肥（陳偉雄）作嘉賓，與田蕊妮、嘉賓主持楊詩敏（蝦頭）和貝依霖（Chantale）大數港女特質，當中亦提及男人召妓和出軌敏感話題。

節目中，田蕊妮講到「男人都係9個滾，剩低嗰個仲諗緊。」3位男嘉賓表示同意，吳浩康指：「依家唔滾嘅會有，但冇滾過嘅我就唔信。」之後又承認自己曾出軌，但依家唔會再咁樣；3人亦覺得召妓與出軌係兩回事，阿肥認為：「出軌係個心郁咗，召妓只是性需要。」不過，佢哋就同意田蕊妮嘅講法，認同男人喺老婆與小三之間選擇，最後都係會返老婆身邊。貝依霖提到自己經常遇到已婚男士，對方都會指與老婆已經無晒愛情可言，田蕊妮表示自己見過好多呢類Case︰「通常啲男人偷食，都係話同個老婆冇感情，之後一定會畀個名份你，到咗有咩問題發生，嗰啲男人一定係返老婆度，我真見過好多呢啲case！」

貝依霖又分享自己十四五歲時遇到一名男性追求者，指對方都係同佢講與老婆感情變淡︰「呢句說話我聽咗十幾年喇！十幾年前，已經有個男人同我講，話同個老婆有問題。嗰陣時約咗我出去，想簽我去佢本雜誌度，之後俾人影到上咗封面。」貝依霖並無公開對方姓名，但就透露該男士老婆係歌手，當時開緊演唱會：「佢都係咁同我講：『我老婆好靚女，我好愛我老婆，不過佢已經係我屋企人，只有感情不是愛情』」。吳浩康隨即表示知道係邊個：「I know who！」唔少網民亦留言討論當事人係邊個。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！