33歲譚坤倫離巢轉戰內地拍劇 大讚待遇好兼工作量較TVB少 出PO澄清：絕對冇什麼踩低任何一方

TVB處境劇《愛·回家之開心速遞》長拍長有，不時都會有演員加入及離開劇組，「CPU」譚坤倫（Alan）喺今年4月宣布離開TVB，並選擇北上發展拍劇。最近佢喺社交網站出PO分享喺內地拍劇日常，大讚內地拍劇待遇較好兼工作量少。

現年33歲嘅譚坤倫，6歲時被送到內地少林寺學校學習北派武術，8歲奪得河南省全市武術比賽「棍術套路冠軍」及「劍術套路亞軍」，本身想當髮型師，但2011年參加TVB節目《功夫新星》入行。譚坤倫亦係一位健身教練，曾透露自己係因為睇咗張家輝嘅電影，所以下定決心要練好自己身形。雖然佢出道十幾年，不過都係飾演配角為主，但《On Call 36小時II》實習醫生傑仔、《果欄中的江湖大嫂》打手Johnny、《包青天再起風雲》馬漢及《愛·回家之開心速遞》飾演IT三子之一CPU，油頭、冇自信、閃縮及口齒不清等，其打扮及演出將角色發揮得淋漓盡致，令人留下深刻印象。

譚坤倫喺今年4月宣布離開TVB，最近佢喺社交網站出PO分享喺內地拍劇日常，除咗大讚有專屬化妝師及休息地方等待遇之外，佢仲話連工作量都少啲：「佢哋一組人每日只係拍2.8頁紙左右，兩組人都係拍五頁紙嘅劇本，唔係呢行嘅朋友可能唔明，但係開心速遞一日可以拍劇本嘅19頁紙，未計外景組。」及「兩個組都係基本上同時開工，所以一般晚飯時間可以收工，咁呢個組就鍾意開早班，基本上冇乜大夜班。」不過佢亦有講到美中不足嘅地方就係放飯時間只有15至20分鐘。

事隔一日，譚坤倫出PO澄清：「六倍工作量呢個講法好似有啲誇張，拎其他例子出嚟講吓啦！我現在拍緊嘅內地劇集30集拍攝六個月，tvb通常一般劇三個月左右，當年包青天再起風雲都用咗半年時間都係30集。古裝、時裝、處境劇，真係好難相比嘅。」及「最近我只係純粹分享兩地不同製作的不同之處，因為一套劇的好與壞，睇嘅係演技同劇情，所以千祈唔好誤會，絕對冇什麼踩低任何一方。」

去到今日凌晨，佢再出PO感謝傳媒、朋友及粉絲支持：「非常多謝媒體嘅報道，出story都係想低調分享，傳媒朋友有時候亦都明白佢哋需要標題吸引啲，亦都明白有啲觀眾，未必會睇內容就留言，所以都明白了解，我嘅表達亦都需要增強，避免不必要誤會，多謝媒體嘅關注，真心冇諗過，多謝你哋。」及「仲有多謝留言支持我嘅朋友、粉絲，一個人走上嚟，頭幾個月真係唔容易，嗰種困難嘅感覺令我感到很難過，現在好彩能夠參與大陸劇，非常感恩，老實講香港人走上嚟，真係冇優勢，普通話講得唔好，拍過嘅作品佢哋覺得冇人睇過，真係一個新人嘅心態，虛心咁樣認識每一個人，好好對待所有工作人員，因為佢哋都唔容易」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！