孟希璘缺席TVB台慶演出貼舊照撰文抒發感受 半年冇工開趁機養病

TVB年度盛事《萬千星輝賀台慶》於昨晚（19日）舉行，近300位藝員盛裝打扮出席及參與演出，不過亦有藝員未有機會出席，令人感到婉惜。曾於《十八年後的終極告白》飾演Jackie、《愛·回家之開心速遞》飾演Laptop的孟希璘（Ball）先後演出過不少劇集，縱然角色不是劇集主角，不過甚有觀眾緣的她令大家留下印象，可惜她昨晚未有機會出席台慶及在台上演出，亦令部分喜歡她的觀眾失望。她於IG貼出之前在台慶演出的照片抒發感受，並接受《Yahoo娛樂圈》訪問分享近況。

孟希璘於IG撰文抒發感受：

「雖然今年台慶唔洗我番去

但係都一定要同我最親密嘅TVB講

TVB Happy Birthday 🎂 🥳

我都慶幸曾經有份係台慶有過精彩嘅演出

附上一啲從來未post過嘅相

大家個喊樣

練talk show都可以手傷哂

我咁瘦嘅

轉眼已經過左3年

記得當時我都係覺得冇咩好拎自己嘅經歷黎做表演

但完左之後好多同事都有送我一個擁抱加兩行眼淚🫂

直到今年！！我係旺角打邊爐，仲有一個經理行埋黎已經眼濕濕，我都嚇一嚇，同我講佢好記得我當年呢一part表演，佢見到我真人就已經有情緒，當年佢正正係有最親嘅人經歷緊同樣嘅痛苦，雖然仲未可以跨過，但佢睇到我嘅表演之後，覺得係一種舒發，因為佢冇方法去舒壓。我都好開心原來不知不覺間幫左你🙌🏻

其實大家一切嘅感動或者心酸都唔係黎自我嘅故事

亦唔係比到幾多正能量

係填補緊睇緊嘅觀眾心入面嘅缺口，有人幫你地將呢一滴眼淚喊出黎，你地面對幾多辛苦，心痛，我都替你地一齊排出黎

❤️

做左啲有意義嘅野

真係有人一世都記得

扯遠左

呢幾日個個觀眾都同我講19號見

今年期待睇我嘅各位街坊唔好意思

我冇表演😂所以比番啲舊野你地睇

收住貨先，睇下下年會唔會有野玩😛

#tvb #tvb台慶 #台慶 #happybirthday

#孟希璘 #ballmang」

雖然孟希璘未有回到電視城參與台慶盛事，不過她亦有於觀看：「有睇回放呀，呢30年黎都睇足嘅，由以前住係清水灣個宿舍已經年年現場睇架啦，因為行幾步就入到Tvb嘅廠😂 今年睇電視都好精彩呀😍」

入行6年的她分享今年拍攝了《奔跑吧！勇敢的女人們》及《愛·回家之開心速遞》，「6月到𠵱家都冇再有新劇，都仲係《開心速遞》嘅，但已經3個月冇開過工啦😂可能因為另外兩位IT狗坤倫同展驊都離開左TVB啦，所以劇情上都未有啱我嘅部分，不過我相信一定會繼續寫Laptop嘅，始終我見到真係好多人好鍾意呢個角色😄」

今年突然少了工作令她不太適應，「我嘅感慨大致都係黎自好想參與呢啲全台盛事啦，你都知我入行開始真係未停過，長期3至5套劇同時在手，仲要係計入劇喎，唔係得幾場嗰啲，就算疫情期間都至少兩劇在身，從來都未試過今年咁，6月開完冇劇緊接，點知可以半年冇咩開過工，出街食飯啲街坊問起我係咪都離咗巢😂當然會有啲失落啦，我仲喺到㗎！仲有啲劇未出街嘅。」患有罕見病風濕免疫系統病（雷諾氏綜合病）的她又透露身體狀況：「呢幾個月我處理咗好多身體上嘅問題，雖然救番我嘅醫師過咗身，我覺得呢幾個月嘅休息好有價值，我相信醫師見到我有得休息一定好安心，因為佢對我最大嘅心願就係可以休息，我就好好把握呢幾個月，養番好身體，咁之後幾時先有劇拍就隨緣啦，太多太多人鼓勵我啦，所以都唔擔心大家耐咗冇見我唔記得我，我信之後再拍嘅作品大家一定更加支持🫶🏻」