港女又萬歲︳吳浩康講男人出軌心態 自爆「變態」原因︰覺得自己好X勁

由田蕊妮、蝦頭同貝依霖(Chantale)主持嘅網台節目《港女又萬歲》播出第2季，首集搵到吳浩康、24味成員Phat同KOLOR樂隊主音Sammy做嘉賓。除咗Chantale大爆14歲時被圈中已婚男搭訕之外，吳浩康都自爆以往出軌嘅心情。

近年做咗老豆又去地盤打工養家，令吳浩康形象正面返晒，但係過去Deep同鍾舒漫拍拖期間，被傳媒影到同另一女子街頭親熱，搞到形象再插水仲分手收場。

節目中田蕊妮問男嘉賓，有冇試過背住女朋友出去滾或者出軌，吳浩康直認有試過。Deep認為當刻有內疚，但因為有另一邊誘惑嘅引力。「係好矛盾，你明知係錯，明知係出賣，但係另一面又覺得做嗰件事又誘惑，出軌有出軌嘅刺激，或者嗰個對象，本身你都會對佢有一個好感。同埋我自己就變態啲，好幼稚地覺得好多人鍾意我，好似覺得自己好X勁。」

吳浩康直言經歷好多次誘惑同出軌嘅內心掙扎，而家覺得好攰就唔再去諗。貝依霖認為男人怕煩先唔去滾，Deep認同，而且話另一原因係唔想冇咗身邊人。田蕊妮另外問見到靚女有冇想同佢地玩，吳浩康直言「冇㗎喇，煩惱嘅開端，好驚。你睇得太化就唔係愛，愛就係好想都唔去。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！